Querelo d'un Pastou countro un Satyri, per uno descripciu de Ledou
Querelo d'un Pastou countro un Satyri, per uno descripciu de Ledou
Hélas, moun Diu, que faré jou,
Tant m'a blassat le Diu d'Amou.
D'autre sou que me sapio playre
Nou podi fa resouna l'ayre,
Despéy que d'un gran pataflésc
Amou me féc peta le clésc,
É que sas boulugos cruélos
Ruméguen toutos mas coustélos;
Tabe per me teni soulas,
Que podi jou dire qu'hélas !
Perque permo d'uno Mestresso
Moun cor est claufit de tristesso.
Hélas, Amour, petit beau Fils !
Le tintansoyo gorjo-lis,
Que nou bézes quand toun arc tiro,
Degus à probo de ta biro,
Oun que tu sios bey de boun él
Un Plouro micos del Castel,
A qui de plours un'aygo claro
Engourgo le nas sur la caro.
A tu men bau, paure Pastou,
Afi que del metis bastou
Que m'a touto la car macado,
Tu me fourniscos la poumado;
Car per remédis, nou n'y a cap,
Des que deforo Bilo on sap
Qu'yeu n'ajo metut sur ma plago:
Las rasics que la térro amago,
Ni las féillos qu'on bey de l'él
N'an pouscut fa junta ma pél:
Aygo de foun ni de ribiéro,
Ni la qu'es al pouts prisouniéro,
Ni la que legueno d'un roc,
N'an en re demingat mou foc;
Talomen qu'yeu demori couro
L'aganido Mort prengo l'houro
Per me cluca d'un rafité
Dins la toumbo per salmité.
Aço d'uno doulento mino
Cantabi sur ma Chalamino,
Sus un gran tupél assietat,
Mentre que d'un autre coustat
Mous Agnelets en bélo troupo
A gloups estourission la poupo
De lours mayres, que tout al tour
Payssion en fredounan del mour.
Quand un Satyri pé de crabo,
Que mous crébocors escoutabo,
Sort d'un matas à bélis saus,
É me dits sens autre perpaus:
Pourtats li l'ansalado,
Camarado, Camarado,
Per soun quiér rejoüy,
Camarado, moun amy.
Hélas, ça dizi jou, Satyri,
Aro qu'as augit moun martyri,
Nou t'en trufes pas, se te play,
Coumo jou nou fégui jamay,
Quand le bél él de Peyrounélo
T'abio demargat la cerbélo,
É que tout enjaurit é bauch,
Biboutejaos sense gauch.
Hà, hà, hà, ça me ba el dire,
Minjoulet, que tu me fas rire:
É lasseto, quino rasou
As-tu de fa coumparasou
D'uno bélo roso esplandido
D'amb'uno lagaigno blasido ?
Ma Peyrounélo béla bou,
Més ça, fay me tu la fabou
De me dire se cap de taro
En re li desoundro la caro,
Aprép que segoun la bertat,
Dins tres mouts yeu t'auré pintat,
Le bisatge de ta Pastouro:
Escouto dounc, à la boun'houro.
De sa courolo l'orre pel
Luzis coum'un quioul de calel,
É dans le plus prim de sa tufo
N'encourdiaron uno baudufo.
Soun froun semblo'un teule canal,
Lis coum'un roüet de petrinal,
É nau pels li fourmon las silhos,
Arrengats coum'un joc de quilhos.
L'un deys éls fa un prigoun clot
Coum'un pichartou sense pot,
L'autre tray desclayrou deforo,
Coum'un gat qu'es à la demoro.
Le sartre que li féc le nas,
Quand se troubéc entre las mas
Tan bélo coulou de majoffo,
Li panéc may d'un tiérs d'estoffo.
Sous pots soun dous broundéls de pa,
Sas dens, le Maladan las a,
É de sa gran bouco d'armari
Sort un sou coum'un calibari.
Sa barbo se trosso en redoun
Coumo la testo d'un biuloun,
Oun per calhibos soun plantados
Quatre bourrugos incarnados.
Sas gautos de double de bioou,
Qu'à l'Alo baldrion may d'un soou,
Ridon coum'uno groullo biéillo,
S'ajuston coum'un portoféillo.
Les lagastis en tens d'estiu
Dins sas aureillos fan lour niu,
É l'hiver (dau dire me doli)
S'yscalfuron al buto l'oli.
Nou ten bouldrio pas dire may,
Tan soun cos deguért me desplay;
A toutes fis se bos encaro
Que passe may que de la caro,
Sas poupos soun, Ah ! capdenou,
Ça bau jou dire de ferou,
La poou de las Nymphos piucélos,
Le fasti de las Pastourélos.
Calo, calo, que per un cop,
Tu nou m'en as countat que trop.
Sus asso preni ma houleto,
É dan dos mas la lébi dreto,
Pey d'un truc entre cap é col,
Moun bilén estendi pel sol:
De fayt é de dit dan la frounzo,
Li crouzi las mas dret la lounzo,
É countro le pé d'un alba
Dan le sarrou le bau traba:
Oun de cent é cent soubarbados
L'é pagat de sas campissados,
É d'amb'un latas nouzelut,
Bouillé grata soun quér pelut,
Se n'éro que m'a fayt proumesso
De courre dret à ma Mestresso,
Counta li de quino affecciu
Yeu menteni sa perfecciu.