Qaraqalpaqstanım bar (Qayıpnazarov)
Hesh kisige salmaq salmay,
Mánzillerge jetken talay.
Bir orında toqtap qalmay,
Asıwlardan asqanım bar.
Ornıǵıp alǵan bekisip.
Sıylanǵan xızmet etisip.
Bayıǵan jubı jetisip.
Talay tolıp-tasqanım bar.
Hár kúni tınısh tań atıp,
Ózine jurttı qaratıp.
Kún turıptı nur taratıp,
Kókte ashıq aspanım bar.
El jaylaǵan ata mákan.
Ózi bir jatqan keń jáhan,
Usı jer bizlerge Watan,
Qutlı qonıs basqanım bar.
Gezgen jerdiń oy-qırların,
Qatar tikken shatırların,
Xalıqtıń ótken batırların,
Táriplegen dástanım bar.
Giya bórtip shıqqan jerden,
Áyne gúller waqtı kelgen.
Shaqa jayıp, qulpı dóngen,
Gúl jaynaǵan bostanım bar.
Sheber kelse naǵıs oyǵan.
Qonaq kelse qoyın soyǵan.
Óz xalqım óz atın qoyǵan
Qaraqalpaqstanım bar!