Qara tas (Kúnxoja)
Janısa pıshaq ótedi,
Qırı-qırına jetedi,
Almas bolıp hám ketedi,
Qayırıń usı, qara tas.
Munarlanıp tawda tursań,
Tómenge qarap qulasań,
Adamnıń basın julasań,
Qayırıń da az, qara tas.
Namakeshtiń salǵan áni,
Usılardan shıǵar máni,
Biyik tawdıń sendur sáni,
Qabaǵın úygen, qara tas.
Kúsh kerek seni jıqpaǵa,
Biyik tawdan qulatpaǵa,
Qaraz, diyirman soqpaǵa,
Qayım dárpentse, qara tas.
|
This work was published before January 1, 1930, and is in the public domain worldwide because the author died at least 100 years ago. |