[ 249 ]Teaching-Club d’Ixelles, revue linguistique (marto, aprilo) publikigis du artikli da A. Giminne Por la L. I. L’autoro refutas unesme la vera utopii di ti qui revas establisar, sive la latina, sive un nacionala linguo, quale L. I. : il montras, ke on devus transformar la linguo selektita tale e tante, ke ol esus tute koruptita e nerekonocebla ; to esus linguo artificala, nur min facila e min neutra kam Ido. Ica esas vere la quintesenco di la lingui europana ; ol apertas a singlu la frontieri di omna landi, ed ol faciligas a lu la posa lernado di irga stranjera linguo, se lu bezonas ol. Ol protektas la nacionala lingui kontre lia reciproka mixado ed « infektado », qua alteras lia propra « genio » ; ol protektas mem la latina kontre la konkurado di la vivanta lingui, e permisos forsan salvar la klasika studyi. Fine, ol preparas la formaco di internaciona e vere homala koncio, qua unionos la populi sen unigar oli, sen supresar lia diverseso e fekunda originaleso.
