[ 246 ]Idano (aprilo). — Rimarki a l’artiklo da Prof. Schmidt en « Die Umschau », da L. Pfaundler. Ni ne bezonas rekomendar ica artiklo da nia prezidanto a l’ atenco di nia samideani : ol esas bonega refuto di la riprochi ed akuzi da l’Esperantisti a la Delegitaro. « On ne povas sat ofte atencigar la Esperantisti, qui cadie vidas en la Delegitaro adversa institucuro, destinata suplantar Esperanto per altra idiomo, ke ta opiniono esas erora ». La Esperantisti devis dicar de ante, ke nultempe li aceptos la decido di la Delegitaro, se ol adoptos altra linguo kam Esp. ; sed tute kontre, li adheris a la programo di arbitrado di la Delegitaro, e mem partoprenis sa Komitato ed olsa decidi. Li do ne havis la yuro rifuzar la reformi. On alegas, ke to esis por li « neceseso di propra konservado » ; sed, tute kontre, nur lia refuzo kreis la « skismo » e la malpaco. On objektas, ke la Delegitaro havis nur la yuro selektar, ne reformar ula linguo. Nu ! kad la Esperantisti esus aginta altre, se la Delegitaro esus selektinta rekte Ido, sen konsultar li ? Dro Zamenhof sempre dicis : « Se ula autoritatoza kongreso od akademio decidos facar ita od ica chanji en la linguo, la Esperantisti kun plezuro aceptos oli e perdos nulo pro to ». Omna kondicioni di ta solena ed iterita promiso esas nun plenigita. Pro quo Dro Zamenhof ne « restis fidela » a sua propra paroli ? La nombro, pri qua on tante fanfaronas, pruvas nulo por la futuro di Esp., same kam pri Volapük. On fidas a la guvernantari ! « Nula guvernantaro povas haltigar la progreso ». Ni konsilas a nia samideani lektar ta artiklo integra e lektigar ol, precipue da la profani. — Nia movado : [ 247 ]Konfero di la meza-germana Ligo de Idani ; diskurso da Peus en Dresden ; propagado da So Jespersen en Usono ; e c. — Literaturala parto : La medicinala superkonsilistino, da Hebbel, trad. Feder. — Hotentoti, da Fr. Buckel. — Bibliografio : Pri la nuna stando di la problemo di L. I. da So Pfaundler (en Neue Freie Presse) ; Volapük, Esperanto od Ido ? da So Lorenz (en Die Umschau). La du autori uzis komparenda texti, max bona e konvinkiva argumento por la profani.
