Presen
Presen
La Balesto, qui la me sap ?
Qu'yeu m'en ane bailla sul cap
An un Lebraut, que dins la Bigno
Countro une Souco s'acousigno.
Ça, ça, jou le bezi delà.
Capdenou, se nou sap boula,
Per tant que guimbe ni que courre,
Be li faré sauta la Bourro.
Ah, Moussur! me semblo deja
Que le bous bezi ranqueja,
É que s'estenilho per térro
Endouloumat de l'anco esquérro.
É léu, Laquai, bouleguen-nous,
Ajats me fayt qualques lardous,
Enginat foc é lardadouro
Per me gauteja de boun'houro
D'un Lebraut que d'aqueste pas
Bauc embouti dedins le jas.
A perpaus, nous abén à l'oulo
Un caul capus amb'uno poulo,
Uno listro de cambajou,
É n'én que Grignoulet é jou.
Fazen-ne douncos per boutado
Un presen à la Camarado,
Que sur tout'autro del Païs
En tout aunou se rejouïs.
Siés soun de qui me play de dire
Que per passa le tens é rire,
É se tira de péssomen,
Elis biben galantomen.
Jamay le fissou de l'embejo
Demest lour bi nou se barrejo,
Ni nou meten cartos en ma,
Que per ripailla l'endouma.
Més à perpaus de nostro casso,
Que pensi jou qu'un Lebraut fasso
En mas de tan de brabo Gen
A qui nou manquo cap de den.
Mutus, é d'amb'une paraulo,
Bouden-le per la bouno taulo
De dous Moussurs que l'autre jour
D'an nous anéguen fa le tour
De Montaudran é de Santagno,
Per trouba la Lébre en campagno.
Elis aro son ays Estats,
De dous Abesques deputats,
Jantis toutis dous, ô jou morio,
Dignes que l'aujolo Memorio
Fasso sabe per raretat
Lour bido à la Pousteritat.
Ay, ay, l'affecciu que m'eyssorbo,
M'a fayt escarni Caritorbo,
Que dits qu'à cent flouris en mas,
É per moustra nou les a pas.
Atal yeu douni quicom aro
Qu'es en sa libertat encaro,
É que taléu que me beyra,
Al grand galop se salbara.
Hazard, y bauc, y soun, abizi
La bigno é la souco que dizi,
Més de la proyo de tantos,
Noun bezi pas, ni pél, ni os.
Ho ! que si fau, per la morburro;
N'es pardi, qu'aco's une turro.
E's-y, hoou, Drolle ? o que non pas,
Al bourdel, tapauc n'éro gras.
Per despiéyt, mal Lebrié li posco
Pauromen rougaigna la closco,
É dedins sous budéls pudens
Reboundre le mour é las dens,
O qu'un gran Auzél de rapino,
En le picassan sur l'esquino,
Fasso que del plus gran petas
Un brian nou brespaillésso pas.
A bous-aus ma plumo se biro,
Moussurs, que mon esprit admiro
Coumo Patrous de perfecciu,
A qui per arros d'affecciu,
Yeu mandabi ço que n'a gayre
Pensaon prene en prenen l'ayre:
Més perque me soun mescountat,
Prenéts en grat la boulountat,
D'un que n'a re que tant li placio
Que d'estre en bostro bouno gracio,
É que fidélomen sera
Bostre Baylet tant que biura.