Pitla Storia bibia/N16

Gejù multiplichea i pans

N auter iede ie Gejù furnà via per l lech cun si sculeies y ie ruvà te n luech desert y ora de jënt. Ma nce te chësc luech ti iel jit do na gran fola de jënt. Gejù ova cumpascion de chësta jënt, la nseniova y variva nce si amalei.

Ntant iel unit tert y i apostuli à dit a Gejù: "Lascia jì chësta jënt, acioche la vede ti paijes plu daujin a se cumpré ite da maië." Gejù à po' dit: "Tan de pans ëis?"

L apostul Andrea à respundù: "L ie n tel mut tlo, che à cin pans d'orde y doi pësc. Ma cie ie pa chësc per tan de jënt?" Gejù à dit: "Purtëde ca da mé i pans y i pësc y fajëde senté ju jënt tla ierba!"

La jënt se à sentà ju. L n fova zirca cinmile uemes zënza cumpedé l'ëiles y i mutons.

Śën à tëut ca Gejù i cin pans y i doi pësc, à auzà i uedli al ciel y i à benedì; po' al fruzà i pans y i à dac ai apostuli, acioche ëi i partësce ora al popul. Nsci à nce Gejù fat partì ora i pësc. Duc canc n'à giatà da maië, nchina che i fova pasciui.

Canche la jënt n'à abù assé, à dit Gejù a si sculeies: "Abinëde adum i tòc, che ëise avanzà, acioche i ne vede a de mel!" I apostuli à abinà adum l'avanzadures, che fova restedes di cin pans d'orde y di doi pësc. L n fova mo dodesc sportules plëines.

Canche la jënt à udù chësc miracul, dijovela: "Chësc ie vëiramënter l profet, che dova unì al mond!"