Pitla Storia bibia/N12

Gejù fej l prim miracul sula noza de Cana

Canche Gejù ova trënt'ani, à ël scumencià a nsenië publicamënter y a fé miraculi. Do y do al nce tlamà si prim sculeies. Danter chisc al cris ora i dodesc apostuli.

L prim miracul à fat Gejù sula noza de Cana, che ie na pitla zità de Galilea. Iló fajovi noza y nce l'oma de Gejù fova da noza. Gejù y si sculeies fova ënghe nviëi.

Ntan noza al scumencià a se finé l vin. La Madona se n à ntendù y à dit a Gejù: "I n'à plu degun vin."

Gejù ti à respundù: "Mi ëura ne n'ie mo nia unida."

Sun chësta à dit la Madona a chëi, che serviva: "Fajëde medrë chël che l ve dirà!" Iló fovel sies buchei de sas. Uni un n teniva doi nchina trëi mesures. Gejù à po' dit a chëi che serviva: "Mplenide chisc buchei cun ega!" Y chisc à mplenì i buchei biei resc.

Po' à dit Gejù a chëi che serviva: "Jetëde ora śën y purtëne a chël, che porta sun mëisa!" I fanc à fat nsci.

Chël che purtova sun mëisa à ciarcià l'ega, che fova deventeda vin. Ma l ne savova nia, da ulà ca, che l vin fossa. Davia de chël al cherdà l nevic y à dit ad ël: "Duc canc dà ca al scumenciamënt n iede de bon vin y po' deplu lesier, ma tu es sparanià l bon vin nchina śën." Nsci à Gejù scumencià a fé miraculi a Cana de Galilea y cun chësc al ël mustrà si gloria devina y si sculeies cherdova ad ël.