Pitla Storia bibia/3

3. La creazion del uomo. L paravis terester.

A l cherië l uomo à Idie fat ora de tiera n corp del uomo y i à suflà ite a chësc n'ana imurtela. Nscila iel deventà vif. Idie i à po' metù inuem Adam, che uel di "uem de tiera".

Chël Bel Die ova mplantà per l uomo n gran verzon, l paravis terester. Te chësc bel verzon fovel laite d'uni sort de ciofs, de lëns y de plantes. Iló à Idie metù ite Adam y i à dit: "D'uni lën dl verzon auses tu maië. Ma dl lën tamez l verzon n'auses tu nia maië; diverche l maies de chësc lën, messeres murì."

Adam fova ntlëuta mo l sëul uomo. Śen à lascià unì Chël Bel Die na gran suenn sëura Adam y ntan che Adam durmiva, i à Chël Bel Die tëut ora na rëpa y à fat dainora n'ëila. Canche Adam se à descedà, i à Chël Bel Die menà daujin chësta ëila. Adam ova na gran legrëza y i à metù inuem Dieva, che uel dì "l'oma de duc i vives."

Adam y Dieva vivova biei cuntënc tl paravis terester. Ëi fova sanc y inuzënc y ne savova nia dl mel. "Lauda l Seniëur, mi ana, y no le desmincë de duc si benefizi."