Pitla Storia bibia/28

I Israelic tla tiera mpermetuda. I populi pagans.

Do carant'ani ie ruvei i Israelic tla tiera mpermetuda, che se tlamova Canaan. Tlo vivovi y frabicova ziteies y paijes. Si majera zità fova Gerusalem. Iló à l rë Salamon frabicà n beliscim templ. Te chësc templ fovel l santuario y l Santiscimo. Tl santuario fajova i prevesc do l ordine, che la ti tucova, i sacrifizi.

Plu tert i dijovun ai Israelic nce Giudieres. Ëi fova l unich popul sula tiera, che cherdova al vere Die. Duc canc i autri populi fova pagans o fanc di dieies fauc. Ëi adurova dieies fauc y menova na vita plëina de vizi. Ma nce na gran meseria fovel pra i populi pagans.

I Giudieres cherdova bën al vere Die, ma menadrë puec d'ëi usservova i cumandamënc de Die. La majera pert ne temova plu nia Chël Bel Die; ëi cumetova picëi contra Idie y ne se emendova nia. Sëura dut l mond fovel duncue picià y meseria. La jënt ne fova plu bona de se judé a sé nstëssa. Po' s'à pa Idie menà picià y à mandà si unich fi dal ciel n tiera per salvé i uomini.