Pened hiela W. Rosenberger gasede: Volapükabled Tälik 1
Bletimo edamanifob tidüpi vpik telid in topöp jula St. Petri. Balüdo epükatob dö vp 11ul 5id komü pösods 160. Pösops 70 elisedomsok al tidüp. Klad pelovegivöl fleniküno obe fa dilekel jula binom gletikün, ab deno labom siedis te luls, sodas nog stuls 25 paipladoms al lasumön lenadelis valik. Spelob das tidadüps 10, äs in tidüp balid oba, osätoms al tidön valikosi zesüdik e das lenadels ovedoms vpels plobik äso ejenos balidna. Söl niveraplofed füsüda Öttingen in Dorpat epükatom 11ul 11id dö vp komü pösods 200. Sek e läser ebinom gletikün. In dels nilikün desänom pükatön telidno efe in sälun nivera.
- St. Petersburg 1887 12ul 7id.
Pospenäd 12ul 8id. Ävendelo ebinob in koköm de komitef musoföpa dadukavik tidastidas militik, kö gasedel e kopanal kadema lekanik söl Bulgàkov Teodor epükatom dö püks lekanik e pato dö e gönü vp obas. Ekomedom vpi as tidamed legudik dadukavik pöninduköl in juls pla latinapük. Liedo plisenels ebinoms te 27 e söl B. no nog binom sevel literata, sevom vpi te dub glamats pebüköl büfü kongef, sodas no äkanom sagön bosi dö pakam legletik püka at. ALiko binos lenitedik e leveütik das vp etuvom pakeli zilik bi söl B. binom nebabledel pelöfik gaseda gletikün e palilädölün: Nòvoye Vryämya.
Se Volapükabled Tälik 1888, Nüm: 1, Pad: 7.