Pened hiela J. Schwindl gasede: Volapükabled Tälik 1
Danob oli ladliküno plo gaseds vpo-tälik, kelis esedol obe. Edünoms obe, no te al liladön nunis vpa ab i al suadön tälelis anik dö pöfüd, dö gud e dö zesüdöf vpa. Tälels at lenadoms vpi se buk blefik, ab liedo no kanoms lemön glamati, bi suäm omik binom tu delidik. If labol buki kel ninom glamati, lovepolamis vpik e tälik, e vödabuki, olemob omi, falo kostom fran bal. Liedo vp no mostepom gletiko, bi suäm glamatas, vödabukas e plägabukas binom tu delidik plo namels e bi mödiküns liegikelas de Alexandria binoms monälik e lavik plo stud. - Ab do lödels mödik zifa obik binoms nedutik e do mödiküns no klödoms al sibin püka volik, labob speli stanik das pianiko e ko sufad anik, i vp olevikodom su tikads badik menas anik kels binoms neflens mostepa e studa. - In kleud deutokatolik is, of-blods kil lendaofs sis bletimo vpi e binob lekotenik dö mosteps ofik. I potacälels tel, balid räbänik e telid maltänel, edemanoms obe bukis vpik kelis egivob omes. Se sams at lul, sumob kludami das mens ut, kels binoms flens mostepa e sikodo i de stud, ovedoms i flens vpa e mostepa omik. Äbinoböv kotenik if älabob is notis, tidamis, zütis smalik al suadön tedalis e flenis studa dö zesüdöf vpa; if labol, sikodo, anikis kelis no nedol, sedolös plido, obe omis. Glidöl oli fleniküno, begob oli lensumon sepeti lestima obik, ko kel blibob in valad gepüka ola.
- Alessandria (Egitto), 1888 3ul 13id.
Se Volapükabled Tälik 1888, Nüm: 4, Pads: 30-31.