Pened de ‚Paulus‛ hebreyanes

KAPIT: I

Posä God espikom ün tims vönädik mödikna ed ön mods mödik lü büröletans dub profetans,
ün fin delas at espikom lü obs dub Son, keli ecälom as geran vala, e dub kel emekom i volis.
Atan, genid glora Goda ä mag binäla omik, kel polom vali dub vöd nämädik okik, e kel dub ok it esäsinodom obis, eseidom oki detaflanü Mayedal in sül löpikün.
Pluom so vemo leigodü silanans, das edagetom nemi, kel binon mu veütikum, ka ut onas.
Kime silananes esagom-li ga föro: «Binol Son obik, efatob adelo oli» e dönu: «Ob obinob pro om Fat, ed om obinom pro ob Son»?
E dönu, ven nüdugom Balidmotäbi ini vol, sagom: «Silanans valik Goda biegonsöd lo om».
E dö silanans sagom: «Ovedükom silananis oma vienis, e dünanis omas flamis fila».
Ab dö Son: «Tron olik, o God! odabinon ün laidüp valik; skäptron gida binon skäptron regama olik.
Elöfol gidi ed ehetol negidi; sekü atos God, - God olik, eleüledom oli ko leüled freda bu kompenans olik».
I «Primo ol, o Söl! estabol tali, e süls binons vobots namas olik,
ats opäridikons, ab ol bleibol dabinön; ets valik ovorikons, äsä klot,
äsva binons mäned, onürölol onis, ed ovotikons, ab ol blebol otan, e yels olik no labons fini».
Kime silananas esagom-li föro: «Seadolöd detü ob, jüs upladob neflenis olik as futabam futas olik»!
Valans et no binons-li lanans dünöl, kels pelesedons ad yufön onis, kels jonidons ad gerön libükami?

KAPIT: II

Sekü atos mutobs plüo demön pelilölosi, voto mosveamobs.
Ibä if vöd fa silanans pespiköl binon fümik, e nefölot e nelobed aliks egetons bläfodi gidik,
lio oskeapobs-li täno de atos, if no demobs beatükami so gretiki? Beatükam kelik pepredon büikumo fa Söl, e pelesion poso obes fa utans, kels elilons omi,
kel i petemunon fa God ma vil omik medü mals e milags, dasevädükams näma, e sestürs Saludalanala.
Ibä no esumätöfükom silananes voli fütürik, dö kel spikobs.
Seimöpo ga ek esagon: «Kis men binon-li, das betikol oni, u son mena, demü kel kudol?
Ecedol omi dü brefüp nemödikumi ka silananis, ed ekronülol omi me glor e stim, ed epladol omi löpü vobots namas olik,
vali epladol disi futs omik». Pö pladam vala sumätöfü om, ga no eneletom ad sumätöfükön bosi. Nu ga logobs, das val no nog pesumätöfon ome,
ab logobs, das Yesus, kel dü brefüp pecedom nemödikum ka silanans, sekü suf deadama oka, pekronülom me glor e stim; atos ejenon dat om, ma plid Goda, pro alan oseivom deadami.
Ibä pötos lü om, demü kel, e dub kel val dabinon, das, ad blinön lü glor sonis mödik okik, nedöfükom dub lesuf geidani onas lü beatikam.
Utan ga, kel saludükom, ed utans, kels pasaludükons, ons valik licinons de fat bal. Sekü kod at no jemom ad nemön onis blodis,
sagölo: «Onotükob nemi olik blodes obik, ed obekanitob oli in komotanef»,
e dönu: «Si! olükonfidob obi ome», e dönu: «Ekö! is binob ko cils, kelis God egivom obe».
Kludo, bi nu cils dub blud e mid okas binons kompenans, i om ebinom leigo kompenan; efe, dat önosükom dub deadam okik utani, kel labom nämädi tefü deadans, sevabo diabi,
ed ölibükom valanis, kels, sekü dred demü dead, äbinons lifüpo in slafam.
Ibä, cedü ob, no kudom dö fät silananas, ab dö ut posbinükäbefa ela ‚Abraham‛!
Sekü atos ämutom vedön leigik, äsä blods okik; dat öbinom dalekultan miserik ä fiedik lo God, ad rekonsilön sinodis pöpa.
Ibä bi om it esufom e peblufodom, fägom ad yufön utanis, kels pasufodons.

KAPIT: III

Demü atos, o svists saludik, kels kompenols pö levok sülik! küpälolsöd ad gospulan ä dalekultan lekoefa obsik: Yesus,
kel binom fiedik lü Jafal okik, leigoäsä i ‚Moyses‛ äbinom in dom lölik okik!
Ibä digädom glori so mödo gretikumi, ka ‚Moyses‛, äsä utan, kel bumom domi, dagetom stimi gretikum, ka dom;
bi dom alik pebumon fa ek, (ab utan, kel ebumon vali, God binom).
E ‚Moyses‛ äbinom fiedik in dom lölik okik, äsä hidünan, ad temunön utosi, kelos pönotükon latikumo;
ab Kristus binom, as Son, cif doma; ed obs binobs dom oma, stipä dakipobs jü fin fümiko nenplafi e speli, demü kels pleidülobs.
Klu, äsä Saludalanal sagon: «Adelo, nü lilols vögi omik,
no düfälükolsöd ladälis olsik, äsä ün tim biedälama, ün dels blufoda in däsärt,
kö büröletans olsik eblufodons obi ad blufön obi, ed elogons vobodis obik dü yels foldeg!
Sekü atos ezunob dö menäd et, ed esagob: Ai pölons in ladäls oksik. No edasevons vegis obik,
sodas äyulob zunölo: Neai onükömonsöd ini takäd oba»!
Kälälolsöd, o svists! das in nek olas ladäl badik ä nenlekredik binon, e das no säslopols Godi liföl!
ab meibolsöd odes aldeliko, dü tim, das nog binos «adel», das nek olas padüfälükol dub blufod sina!
Ibä evedobs kompenans Kristusa, if dakipobs fümiko de prim jü fin konfidi.
Esagoy ga: «Adelo, nü lilols vögi omik, no düfälükolsöd ladälis olsik, äsä ün tim biedälama»!
Kins nu utans äbinons-li, kels äbiedälikons? Ons valik no äbinons-li utans, kels emogolons se Lägüptän cifamü ‚Moyses‛?
Ta kins ezunom-li dü yels foldeg? No äbinos-li ta utans, kels isinons, kelas koaps ifalons in däsärt?
Ta kins eyulom-li, das no önükömons ini takäd omik? No äbinos-li ta utans, kels änelobedons?
E logobs, das no ekanons nükömön demü nenlekred oksik.

KAPIT: IV

Dalobs kludo dredön, das seimna, dü tim, das prom tefü nüköm ini takäd, lonöfon, ek olas klülädol nesaidön.
Ibä atos penotükon, äsä ones, i obes. Ab vöd, keli älilons, no äfruton onis, bi lilans no älabons pö at lekredi.
Obs ga nükömobs ini takäd, bi elüsumobs lekredi, maä esagom: «Äsä eyulob zunölo: No onükömons ini takäd obik‛, do vobots valik omik de jaf levala ya ädabinons.
Ibä esagoy seimöpo dö del velid: «E tü del velid God ätakädom de vobots valik okik».
E tö top votik: «No onükömons ini takäd obik».
Bi nu pelonos, das semans onükömons ini takäd, ed utans, kels egetons büikumo nuni, no enükömons kodü nenlekred,
dönu elonom deli, sevabo: «adel», bi pos lunüp sagom dub ‚David‛, äsä pesagos löpo: «Adelo, nü lilols vögi omik, no düfälükolsöd ladälis olsik»!
Ibä, if ‚Iosue‛ igivom ones takädi, no ispikomöv dö del votik latikum.
Klu takäd bleibon dabinön pro pöp Goda.
Ibä utan, kel nükömon ini takäd Goda, takädon ito de vobots okik, leigoäsä God de löniks oka.
Lezilobsöd kludo ad nükömön ini takäd et, das no reafobsös ini sam ot nelobeda!
Ibä vöd Goda binon lifik ä nämöfik, japikum ka gläv telkötik alseimik, dudranik jü teil vü lan e lanöf, vü yoin e pif; binon cödal tikodas e vätälas ladäla.
Somo dabinäd nonik binon nelogädik lo om; val binon nüdik, e penetegon lo om, keli mutobs demön.
Nü labobs dalekultani gretik, balani, kel edutevom sülis: Yesus, Son Goda, dakipobsöd lekoefi!
Ibä no labobs dalekultani, kel no kanom kesenälön ko fibäls obsik, ab balani, kel, lölöfiko sümo äsä obs, peblufodom, efe nen sinods.
Klu golobsöd nenplafo lü tron benäda, ad dagetön miseri e benädi pro yuf ün tim pötöfik!

KAPIT: V

Ibä dalekultan alik, kel pasumom se mens, pacälom gönü mens ad sakrifön Gode legivotis e sakrifotis demü sinods onas.
Kanom labön senäli däläla pro nennolans e pölans, bi om it suföfom fibäli.
Demü atos labom bligi, ad blinön i pro ok it, äsä pro pöp, sakrifotis demü sinods.
E nek sumom itao diniti at, ab utan, kel palevokom fa God, äsä el ‚Aaron‛.
Leigo i Kristus no eglorükom oki me dinit dalekultana, ab om, kel äsagom ome: «Binol Son obik, adelo efatob oli».
Äsä tö top votik sagom: «Binol laidüpio kultan ma lonül ela ‚Melchisedech‛».
Ün dels, ven äbinom midik, eplekom ed elesagom me pleks vemik e drens ome, kel äfägom ad savön omi de deadam, e pelilidom e pelibükom de dredäl omik.
So, do äbinom Son, elärnom dub suf okik lobedi,
ed evedom, ven irivom zeili okik, kodan sava laidüpik valanas, kels lobedons omi,
e pestetom fa God dalekultan ma lonül de ‚Melchisedech‛.
Dö atos mutobs sagön mödikosi, ab plän binon fikulik, bi evedols trögiks pö lilam.
Ibä du imutols binön tidans, bi binols ya dü lunüp lekredans, neodols dönu primatidi vödas Goda; neodols miligi, no zibi solidik.
Alutan, kel gebon miligi, ga no suemon gidi, bi nog binon äsä cil.
Ab zib solidik binon pro daülans, pro utans, kels eskilükons sienis oksik dub plek, ad distidön gudi e badi.

KAPIT: VI

Klu nedemobs primotis gospula Kristusa, ab pladobs obis sui tikädöp daülanas, nes stabükön dönu leceni de vobots deadik lü lekred in God;
lejon bluneda e namisupladama, lelifikam deadanas e cödet laidüpik.
Atosi odunobs, if God dälom osi.
Ibä binos nemögik ad leceinön dönu utanis, kels seimna pikleilükons ed egutons legivoti sülik, ekompenons pö Saludalanal,
ed egutons vödi glorik Goda, e nämis vola fütürik,
e täno esäslopikons; bi ekrodons tiko dönu Soni Goda, ed ekofons omi.
Ibä glun, kel drinon reini bundano sui on falöli, e prodon planemi frutik utanes, kels ebefeilons oni, dageton benedi de God;
ab glun, kel prodon spinabimülis e tilis, pesufükon maledite; e fin bonon, das ats pafefilükons.
Ab tefü ols, o palöfölans! süadobs, do spikobs so, das binols gudikums ed odagetols beati.
Ibä God no binom negidik. No glömom vobodis olsik: löfi, keli ejonülols pro nem omik, e dünis, kelis egevols saludanes e nog gevols ones.
E desirobs, das alan olas jonülol zili ot, dat labolsös jü fin speli lölöfik!
dat no vedolsös trögiks, ab züpolsös utanis, kels gerons dub lekred e lunasufäl promis!
Ibä ven God ägevom promis ele ‚Abraham‛, e no äkanom yulön nämätü ek, kel äbinom gretikum, äyulom nämätü ok it,
ed äsagonm: «Vö! obenedob bundano oli, ed omödükob oli vemo»,
ed estebedölo sufädiko, ‚Abraham‛ egetom föli proma.
Mens yulons ga nämätü ek, kel binon gretikum; yul dünon ad lesiön bosi, e taspik alik binon deimik.
Bi God nu ävilom lesiön kazetiko geranes proma, vio fümädik slud omik äbinon, ägebädom yuli,
dat obs, dub lesags fümädik bofik, tefü kels, binos nemögik, das God älugom, labobsös meibi nämöfik ad dakipön speli, ad kel dalobs konfidön!
Dalabobs oni, asä naki fümädik ä dulöfiki pro lan obsik, kel äsvo binon in top po körten,
lü kel Yesus gönü obs ebügolom; om, kel ma lonül ela ‚Melchisedech‛ evedom dalekultan laidüpik.

KAPIT: VII

Ibä el ‚Melchisedech‛ at äbinom hireg di ‚Salem‛, kultan Goda mu löpiküna; äkosgolom eli ‚Abraham‛, ven atan ägegolom de vikod okik hiregas, ed äbenedom omi,
ed ‚Abraham‛ ägivom ome degdili vala. Balido nu, tradutod nema omik binon: hireg gida, täno i äbinom hireg di ‚Salem‛, kel sinifon: hireg püda;
älabom ni fati, ni moti, dafamülaregistari nonik; lif omik älabon ni primi, ni fini. So peleigükölo Sone Goda, eblebom laidüpio kultan.
Logolsöd seimna! vio veütik äbinom! Lefatal: ‚Abraham‛ ägivom ome degdili lefanota.
Nu, sons ela ‚Levi‛, kels edagetoms kultanami, egetoms büdi ad nüflagön ma lonem degdili de pöp, sevabo de blods oksik, do atans elicinoms de ‚Abraham‛.
Ab om, kel no ädutom lü dafamül omsik, egetom degdili de ‚Abraham‛, kel idagetom promi, e päbenedom fa om.
Benö! nen taspikot, ek, kel labon gredäti bapik pabenedon fa utan, kel binon löpikum.
Is nu mens deadöfik lüsumons degdili, ab us balan, kel ma temunod lifom.
Si! kanoy äsvo sagön, ‚Levi‛, kel getom degdilis, egivom ito dub ‚Abraham‛ degdilis;
ibä, äbinom nog in loins fata okik, ven ‚Melchisedech‛ äkosgolom omi.
Benö! if nu levit (ibä in at lonem stabon, keli pöp egeton) fölonös lölöfiko diseini okik, sekü kis tän ebinos-li zesüdik, ad cälön kultani votik ma lonül ela ‚Melchisedech‛, e no ma lonem ela ‚Aaron‛?
Ibä, if kultanam pavotükon, tän zesüdiko lonem muton pavotükön.
Ibä utan, keli pepenölos löpik zeilon, äbinom se tribüt votik, se kel nek edünom latari.
Binos ga lölöfiko kleilik, das Söl obsik licinom se Yudän, e tefü tribüt at ‚Moyses‛ esagom nosi dö kultans.
Ed atos binon nog mödo kleilikum, ven kultan votik pacälom ma lonül ela ‚Melchisedech‛,
sevabo balan, kel evedom kultan, no ma lonül stabü licin midik, ab ma lonül stabü lif laidüpik.
Ibä temunod tonon: «Binol laidüpio kultan ma lonül ela ‚Melchisedech‛»,
Büd büikum ga pafinidon, ven evedon nennämik ä nenfrutik,
(lonem ga evedükon nosi lölöfiki); pla on spel gudikum ekömon, dub kel nilikobs lü God.
E zuo, atos no ejenon nen yul,
(ibä etans evedoms kultans nen yul, ab atan egetom kultanami de om, kel äsagom ome: «Söl efümükom osi yulo, e no olepidom osi: Binol laidüpio kultan ma lonül ela ‚Melchisedech‛»).
So Yesus evedom garanan diateka gudikum.
Ön num gretik etans evedoms kultans, bi päneletoms dub dead ad blebön kultans;
om ye, dubä bleibom dabinön laidüpo, dalabom kultanami, kel no loveikon ad votan.
Sekü atos ai kanom beatükön utanis, kels dub om kömons lü God, bi ai lifom ad bitikön gönü ons.
Lekultani somik äneodobs: saludik, nenbadik, nenmiotädik, ededitöl de sinans, e stadöl löpikumo ka süls;
balani, kel no nedom sakrifön büiko demü sinods lönik okik, e poso demü uts pöpa; ibä atosi edunom pö naed ai lonöfik bal, ven äsakrifom oki it.
Lonem cälon ga dalekultanis menis fibälis labölis; ab vöd me yul pefümüköl, kel äkömon pos lonem, äcälon Soni, kel enendöfikom laidüpio.

KAPIT: VIII

Ledin pepenölosa binon, das labobs dalekultani so gretiki, kel eseidom oki detaflanü tron Mayedala in süls,
asä dünan kulta e tabära veratik, keli Söl efünom, e no men.
Ibä dalekultan alik pecälom ad blinön legivotis e sakrifotis; sekü atos i om ämutom labön bosi, keli äkanom sakrifön.
If nu binomöv su taled, tän igo no binomöv kultan, bi us kultans dabinoms, kels blinoms sakrifotis ma lonem.
Atans ye dünoms lä lokot e jadot dinas sülik, bai kels ‚Moyses‛, äsä ägetom komiti, ömekom tabäri. («Kälälolöd»! God äsagom, «das mekol vali ma sam, kel pejonon ole su bel».)
Ab nu Kristus egetom düni veütikum, bi i binom Medal diateka gudikum, kel pelonon dub proms gudikum.
Ibä if diatek balid ebinonöv neblamabik, tän no esukoyöv telidi.
Pro etans ga binos blam, ven sagom: «Ekö! dels okömons, Söl sagom, das lonülob ko dafamül Yisraeläna e ko dafamül Yudäna diateki nulik,
no kel binon leigik lü diatek, keli elonülob ko büröletans onas, tü dels, kü ägleipob namis onsik, ad dugön onis se Lägüptän; ibä no eblebons fiediks lü diatek obik, ed efätükob onis, Söl sagom.
At binon diatek, keli olonülob pos dels at ko dafamül Yisraeläna, Söl sagom. Ostäpodob ones lonis obik, ed onüpenob onis ini ladäls onsik. Obinob pro ons God, ed ons obinons pro ob pöp.
E no plu sifan alik otidon kesifane okik e blode okik: Seivolöd Söli! ibä valans osevons obi, e smalans onas e gretans onas.
Obinob miserik pö negid onas, e no plu omemidob sinodis e nefölotis onsikis».
If nu spikom dö diatek nulik, tän cedom diateki balid evönädiköli; benö! bos, kel evönädikon ed evorädikon, primikon ad nepubön.

KAPIT: IX

So i diatek balid älabon büdülis lonik okik pro kult, e saludöpi talik.
Dil balid tabära pästiton so: in on ädabinons litikipian, tab e jonetabodeds; at pänemon: saludöp.
Po körten telid nu dil tabära äbinon, kel pänemon: Musaludöp;
at äninädon bovälalatari goldik e büdedastonabogi löliko ko gold peramatöli, in kel äbinons luflad goldik ko manad, staf di ‚Aaron‛, kel ifloron, e büdedastons,
sus ats kerubs glora äjadons rekosilategoti. Dö ats nu no osagobs patis.
Posä val so pistiton, ini dil balid tabära kultans ün del alik änügoloms ad plägön kulti;
ab ini dil telid te dalekultan äkömom balna a yel, no nen blud, keli äsakrifom demü nefölots nenvilik oka ed uts pöpa;
me kelos Saludalanal sevädükon, das veg lü Musaludöp no nog binon notidik, dü tim, das dil balid tabära nog dabinon.
Atos binon sümbol pro atim, ün kel legivots e sakrifots pablinons, kels no fägons ad kotenükön konsieni utana, kel dunom kulti,
e kels te binädons me zibs, drineds e lavs difik, sevabo büdüls midi teföls, kels pelonons jü tim votastida.
Kristus güo bitiköl as lekultan dinas fütürik, ekömom te balna ini saludöp, da tabär gudikum ä lölöfikum, kel no pemekon me nams, sevabo, kel no duton lü jafot at,
e no ko blud hikaparas e bubülas, ab ko blud lönik okik, ad tuvön beatükami laidüpik.
If ya blud toras e hikaparas, e zen kunüla, kel pagifülon ad klinükön koapi, saludükon profenanis,
vio mödikumo blud Kristusa, kel ededietom oki dub Lanal laidüpik nenmiotädiko Gode, oklinükon konsieni obsik de vobots deadik, ad kultön Godi liföl.
Sekü atos binom Medal diateka nulik; dat, nü edeadom ad rekosilön nefölotis timü diatek balid pedunölis, utans, kels pevokedons, dagetonsös föli proma gerota laidüpik!
Ibä utöpo, kö tästum dabinon, zesüdos, das dead tästumana pakonstaton;
ibä tästum te lonöfon, if deadans dabinons, neai ga labon lonöfi timü lif tästumana.
Sekü atos i diatek balid no pesaludükon nen spil bluda.
Ibä, posä büdeds valik piloreidons ma lon fa ‚Moyses‛ lo pöp lölik, äsumom bludi bubülas e hikaparas ko vat, lain karminik e hüsop, ed äbegifülom me ats e buki it e pöpi lölik,
äsagölo: «Atos binon blud diateka, keli God ebligädom oles»!
Leigo äbegifülom me blud tabäri e stömis valik kulta.
Ma lonem dins ze valiks päklinükons me blud; nen spil bluda pard no jenon.
Klu äzesüdos, das mags dinas sülik päklinükons me meds at, ab dins sülik it me sakrifots, kels ävöladons plu ka ats.
Ibä Kristus no enügolom ini saludöp me nams pemeköl: kopied voikosa, ab ini sül it, ad dajonön oki lo God demü obs.
I no änedom sakrifön suvo oki it, äsä dalekultan, kel nügolom alyeliko ini Musaludöp ko blud no okik;
voto, de prim levala imutomöv sufön suvo; ab nu pos pasetikam pötik tima epubom te balna, ad moedön sinodis dub sakrif oka it.
Leigo äsä binos fümik, das mens mutons deadön balna, e pos atos cödet kömon,
so i Kristus, posä pesakrifom balna ad moedön sinodis mödikanas, opubom pö naed telid, ye no demü sinods menas, ab ad beatükön utanis, kels spetons omi.

KAPIT: X

Bi ga lonem binon te jad saludadinas okömöl, e no mag voik onas, at fägon nemögiko ad nedöfükön medü sakrifots, kelis blinoy laiduliko alyeliko, utanis, kels nilikons so lü God.
If atos binonöv soik, sakrifans no ifinükomsöv-li ad sakrifön, bi, dubä ya seimna piklinükoms, no plu älabomsöv sevedi sinodas?
Güo in sakrifots at alyeliko mem sinodas dabinon.
Blud toras e hikaparas ga nemögiko fägon ad moükön sinodis.
Demü atos sagom pö köm oka ini vol: «Sakrifoti e legivoti no desirol; ab koapi eblümükol obe.
Holokostis e sakrifotis demü sinods no plidol.
Täno äsagob (in bukaruläd epenoy dö ob): Ekö! kömob, o God! ad dunön vili olik».
Büiko äsagom: «Sakrifoti e legivoti, holokostis e sakrifotis demü sinods no desirol e no plidol», ats binons sakrifots, kels pablinons ma lonem;
pos atos äsagom: «Ekö! kömob ad dunön vili olik». So mopladom balidi ad givön pladi telide.
Stabü vil at pesaludükobs förio dub sakrif koapa Yesusa: Kristus.
Is kultan alik stanom ad dunön aldeliko kulti okik ed ad blinön ai dönu sakrifotis ot, kels ga neai fägons ad moükön sinodis,
ed us om, posä eblinom demü sinods sakrifoti balik bal, eseidom oki laidüpio detaflanü God,
fovo stebedölo, «das neflens omik popladons as futabam pro futs omik».
Ibä me sakrifot bal at enedöfükom laidüpio saludükäbis.
Atosi i Saludalanal temunon obes, ibä posä esagon:
«At binon diatek, keli elonülob pro ons pos dels et, sagom Söl: Ostäpodob lonis obik ini ladäls onsik, ed onüpenob onis ini täläkts onsik,
e sinodis e nefölotis onsikis no plu omemidob».
Benö! nü ats pepardons, sakrifots demü sinods no plu binons zesüdiks.
Bi nu labobs gitäti, o svists! ad nügolön dub blud Yesusa ini Musaludöp,
ekulom ga obes vegi nulik lifik da körten, sevabo, da mid okik,
e labobs kultani gretik pepladöl ini dom Goda;
lükömobsöd ko ladäl stedälik, ko konfid fulik in lekred, bi ladäls obsik peklinükons de konsien badik, e koaps obsik pelavons me vat rafinik.
Kipedobsöd lekoefi fümädik spela! (bi om, kel egivom promi, binom fiedik).
E demobsöd odis, e stigädobsöd odis ad löfön ed ad dunön vobodis gudik,
ad no blebön fagiks de kobikams olsik, äsä semans kösömons ad dunön, ab meibobsöd obes, fe plüo, plü del gretik nilikon!
Ibä, if sinobs sevediko, posä edagetobs dasevi verata, sakrifot demü sinods no plu ereton,
ab spet jeiköl cödeta e fila flamöl, kel onosükon taanis.
If ek nestümon lonemi di ‚Moyses‛, odeadon nenmisero nämätü temunod temunanas tel u kilas,
pönodi lio vemikumi cedols-li täno, das utan meriton, kel dästepon Soni Goda, ludigidon bludi diateka, dub kel pesaludükon, e viodon Lanali benäda?
Sevobs ga, das pepenos: «Vindit duton lü ob, obläfob, Söl sagom», ed in top votik: «Söl ocödom pöpi okik».
Binos jeikik ad reafön ini nams Goda liföl.
Memolsöd paseti, ün kel, posä pekleilükols, esufols komipi ninälik mödik!
dilo bi ols it äbinols yegs riprodas e dränälas, dilo bi ekompenols ko utans, kels esufons träiti ot.
Ibä äkeliedols ko fanäböpans, ed äsufols fredo ravi dalabotas olsik, bi äsevols, das labols dalabi gudikum ä fümiki in süls.
Klu no deimolsöd nenplafi olsik! at blinon bläfodi gretik.
Ibä neodols sufäli, dat, posä ufölols vili Goda, dagetolsös promoti!
«Klu stebedolsöd nog dü brefüp, ed om, kel okömom, odabinom, no oblebom fagik.
Gidan olifon in lekred, ed if yilidon sekü dred, tän lan obik no plidon oni».
Ab bligäd obsik no binon: yilidön, kelos kodon päridikami, ab: lekredön, ad savön lani.

KAPIT: XI

Lekred nu binon konfid fümik dinas paspelöl, ä süad dö dins, kels no binons logamoviks.
Demü lekred oksik ga büans egivons temunodi stimik.
Dub lekred dasevobs, das leval pejafädon dub vöd Goda; klu, das dabinots logädik no edavedons se logamovikos.
Dub lekred ‚Abel‛ eblinom Gode sakrifoti jerabikum, ka uti ela ‚Cain‛; dub lekred at dö om petemunos, das äbinom ritan; kodü legivots oma God it etemunom atosi; e dub lekred at nog spikom pos deadam okik.
Dub lekred ‚Henoch‛ pämosumom nes logön deadi; no pätuvom, bi God imosumom omi. Bü mosum okik ädagetom ga temunodi, das God äplidom omi.
Nen lekred nu no binos mögik ad plitön Godi. Ibä utan, kel nilikon lü God, muton lekredön, das dabinom, e das benobläfom utanes, kels sukons omi.
Dub lekred ‚Noe‛, penunedöl tefü dins, kels no nog äbinons logädiks, ädemom atosi, ed äbumom raki, ad savön famüli okik. Dub atos emicödom volanefi, ed evedom geran gida lekreda.
Dub lekred ‚Abraham‛, ven pävokom, äsetevom lobediko lü top, keli ögetom as gerot; äsetevom, nendas äsevom, kitopio ägolom.
Dub lekred älomädükom oki ini län pepromöl, äsä ini län foginik, bi älödom us in tänads ko ‚Isaac‛ e ‚Iacob‛, kels igeroms promi ot.
Ibä ästebedom zifi labü stababumäds, kela bumavan ä jafädan God binom.
Dub lekred igo ‚Sara‛ edagetof fägi ad pafekunön, do bäldot pötik ad atos ipasetikon; bi älecedof omi, kel ipromom atosi, konfidoviki.
Sekü atos i de balan, kel ya ilifovorikom, posmenef pemoton so mödik, äsä stels len sil, ed äsä sab jola mela, kel binon nenumovik.
Atans valik edeadons in lekred, nendas edagetons promotis, ab elogons ed eglidons onis fagao, älekoefölo, das äbinons foginans e lotans su taled.
Ibä utans, kels sagons dinis at, sevädükons kleiliko, das sukons lomäni.
Ed if ibetikonsöv pö atos läni, keli ilüvons, tän ilabonsöv pöti ad gegolön usio.
Ab nu äledesirons lomäni gudikum, sevabo süliki. Demü atos God no äjemom ad panemön God onas; ibä efünom ones zifi.
Dub lekred esakrifom ‚Abraham‛ eli ‚Isaac‛, ven päblufom; om, kel egetom promi, esakrifom soni balik okik;
tefü om ga pisagos: «In ‚Isaac‛ olabol posbinükäbis, kels olabons nemi olik».
Äspetom, das God älabom nämädi ad lelifükön deadanis. So äsvo egegetom omi.
Dub lekred ‚Isaac‛, äsagöl dinis ökömöl, ebenedom eli ‚Iacob‛ ed eli ‚Esau‛.
Dub lekred ‚Iacob‛, ädeadölo, äbenedom alani sonas ela ‚Ioseph‛, ed oki ästütölo su gnob stafa okik, ästimodom omis.
Dub lekred ‚Ioseph‛ äbetikom pö deadam okik setevi cilas Yisraeläna, ed ägevom büdülis tefü boms okik.
Dub lekred ‚Moyses‛, pos moted okik mö muls kil, päklänedom fa pals okik, bi atans älogons, das cil äbinom jönik, e no ädredons pro büd hirega.
Dub lekred ‚Moyses‛, ven ivedom gretik, ärefudom ad panemön son dauta faraona,
bi äbuükom ad kesufön ko pöp Goda, kas labön fruti nelaidüpik sekü sin.
Äcedom lunofi demü Kristus liegi gretikum, ka divis Lägüptäna; ibä ädemom bläfodi.
Dub lekred älüvom Lägüptäni, nes dredön tefü zun hirega; ibä älaidälom, äsva ilogom Nelogädali.
Dub lekred ästidom pajadi e begifüli bluda, dat päridükan balidmotäbas no doatonös onis!
Dub lekred ätevons love Redamel, äsva ägolons love län sägik, du Lägüptänans, ven äriskoms otosi, änoyoms.
Dub lekred möns ela ‚Iericho‛ äfalons, posä izügoloms dü dels vel zü ons.
Dub lekred jinepuedan: ‚Rahab‛ no epäridikof ko nelobedans, bi igetedof püdo spionanis.
Kisi osagob-li nog plu? ibä tim odefonöv, if okonoböv dö ‚Gedeon‛, ‚Barac‛, ‚Samson‛, ‚Iephtha‛, ‚David‛, ‚Samuel‛ e profetans,
kels evikodoms dub lekred regänis, eplägoms gidi, edagetoms promis, efärmükoms lemudis leonas,
ekvänoms vemi fila, eskeapoms de köted gläva, de fib evedoms nämiks, ebinoms nämiks in komip, efügoms militis neflenik.
Voms ägegetofs se lelifükam deadanis oksik. Votans ädabinons, kels pädatomons, e no älüsumons libükami ad dagetön lelifikami gudikum.
Dönu votans esufons kofi e lebatami, ed i jänädami e fanäböpami,
pestonons, pedusaovons, petomons me datomöms, pesasenons me gläv, äzitevons in jijipaskins e jikaparaskins, pö nelabs, dränäls e miträits.
Vol no ädigädon ad labön onis: ezitevons da däsärts, love bels, in lekevs e slitods.
Etans valik, kels ebinons temunans lekreda, no edagetons föli proma,
bi God ijonidükom obes gudikumosi, dat no önedöfikonsös nen obs!

KAPIT: XII

Benö! i obs, pezüöl dub lefog so gretik temunodas, vilobs kludo deseitön fledi alik e sini obis tädöli, e belifön sufälo karieri obes pebüojonidüköli;
du demobs Geidani ä Lölöfükani lekreda: Yesus, kel, demü fred oke pebüojonidüköl, äludigidölo jemodi, epolom krodi, ed eseidom oki detaflanü tron Goda.
Betikolsöd ga omi, kel esufälom, das sinans etaspikons so vemo ome, dat ols, eperölo kuradi, no fenikolsös!
No nog etadunols bludamio pö komip olsik ta sin.
Ed eglömols meibi, keli esagom oles asä sones: «O son obik! no lutäxetolöd lepöni Söla, e no nenkuradolöd, if papönol fa om!
Ibä Söl lepönom utani, keli löfom, lebatom soni alik, keli lüsumom».
Sufälolsöd lepöni! God träitom olis asä sonis. Ibä son vo dabinom-li, keli fat no lepönom?
If ublebolsöv nen lepön, pö kel valans ekompenons, tän binolsöv bastars, no sons voik.
Ven nu obs, do pelepönobs fa fats lönik obsik, ga stimobs omis, no mutobsöv-li sumätöfükön plüo obis Fate lanas, e so lifön?
Etans ga elepönoms obis dü brefüp ma plid oksik, ab om lepönom obis ad frut obas, dat okompenobsös pö salud omik!
Lepön alik jinon binön büfiko no din freda, ab lüga; ab latikumo prodon fruti gida e püda utanes, kels eskilükons okis dub on.
Demü atos, löükolsöd namis trögik e kienis fiböfik!
Kamükolsöd vegis pro futs olsik, dat bos, kel binon lemik no pamiyoinonös, ab buikumo panätükonös!
Steifolsöd ad kipedön püdi ko valans, ed ad dagetön saludikami, nen kel nek ologon Söli!
Kälolsöd, das nek peron benädi Goda, das no vul biedäla löikon e kodon töbi, e dub atos mödikans pamiotons!
das nek binon nepuedan, u nensaludan äsä ‚Esau‛, kel äklemom tä zib bal balidmotedagitäti okik.
Ibä nolols, das, ven ävilom gerön latikumo benedi, pädeimom; no ätuvom pöti pro lepid okik, do ästeifom ko drens ad dagetön benedi.
Ibä no enilikols lü bel doatamovik, [‚Sinai‛] pelivupöl in fil flamöl, dag, jad e tep,
tonäd posunas e vög vödas. Utans, kels älilons atosi, älebegons ad no plu vögön lü ons.
(Ibä no äkanons sufälön utosi, kelos päbüdon ones: «Igo if nim doatonöv beli, pöstononöv».
E pubod äbinon so jeikik, das ‚Moyses‛ äsagom: «Fulob me dred, e dremob»).
Nö! ekömols lü bel: ‚Sion‛ e lü zif Goda liföl, lü el ‚Hierusalem‛ sülik, e lü degmilats silananas,
lü zälakobikam e komot balidmotäbas, kels peregistarons in sül, lü God: Cödal valanas, e lananas ritanas enedöfiköl,
lü Yesus: Medal diateka nulik e blud pespilöl, kel spikon nämöfikumo ka ut ela ‚Abel‛.
Kälälolsöd, das no deimols omi, kel spikom lü ols! ibä utans no eskeapons de pön, kels ädeimons omi, ven änunedom su taled; vio plüo täno obs, ven deflekobs obis de om, kel spikom se sül.
Ifi vög omik edremükon ettimo tali, nu enunom: «Nog balna odremükob no te tali, ab i süli».
Vöd at: «Nog balna» zeilon dädükami bosa mufovik, bosa pejaföl, dat utos, kel no binon mufovik, bleibonös dabinön!
Danöfobsöd kludo, das kompenobs pö regän nemufovik, e dünobsöd so plitiko Godi, ko dalestüm e relöf!
Ibä God obsik binom fil nosüköl.

KAPIT: XIII

Svistilöf blibonöd in ols!
No glömolsöd lotidiäli! Dub on semans, nes äsevons osi, elotidons silananis.
Betikolsöd fanäböpanis asä kefanäböpanis, miträitäbis, äsva koaps olas it esufons miträitis!
Mat binonöd puedälik ön tef alik! Matabed binonöd nenstenik! Nepuedanis e dulteranis God ocödetom.
Kondöt olsik binonöd nen moniäl! Kotenolsöd ko utos, kelosi dalabols! ibä God it esagom: «No ofätükob olis, no olüvob olis».
Kanobs kludo sagön kurado: «Söl binom yufan obas, no odredob. Kisi men oblinädon-li obe»?
Betikolsöd büanis olsik, utanis, kels enunoms oles vödi Goda; züpolsöd lekredi omsik, küpolsöd seki kondöta omsik!
Ed ädelo ed adelo Yesus: Kristus äbinom e binom otan, ed obinom otan laidüpio.
No leadolsöd pöladugön olis dub lejons mödasotik e foginiks! ibä binos gudik, das ladäl panämöfükon dub benäd, no dub zibs, de kels gebölans no labons fruti.
Labobs latari, de kel utans, kels dünoms tabäri, no daloms fidön.
Ibä koaps nimas, kelas blud pablinon ini Musaludöp fa dalekultans demü nosükam sinodas, pafefilükons plödü tänadöp.
Demü atos i Yesus, ad saludükön pöpi me blud lönk okik, esufom plödü leyan.
Segolobsöd kludo se tänadöp lü om, ad sufön lunofi omik!
Ibä no labobs is zifi bliböl, ab sukobs fütüriki.
Vilobs kludo blinön dub om Gode laidulo sakrifoti leloba; sevabo fruti lipas, kels lekoefons nemi omik.
No glömolsöd ad benodön ed ad kekompenükön! ibä God plidom sakrifotis somik.
Lobedolsöd duganis olsik e sumätöfükolsöd olis omes! ibä as mens, kels omutoms gidükön seimna, galedoms lanis olsik. Kälälolsöd, das dunoms atosi fredo e no seifölo! ibä atos no binon frutik pro ols.
Plekolsöd pro obs! ibä lecedobs, das labobs konsieni klinik, bi vilobs ön tefs valik kondötön gudiko.
Plüo kazetiko lebegob oles ad dunön atosi, dat pagegivobös oles plüo büikumo!
God püda, kel elelifükom nu se deadans galedani gretik jipas, Söli obsik: Yesus Kristus, dub blud diateka laidüpik,
blinädomöd oles dinis valik, kels binons gudiks, sodas fölols vili omik, du süükom in ols utosi, kel pliton omi dub Yesus: Kristus, lü kel glor binonöd laidüpio! So binosös!
Lebegob oles, o svists! lüsumolsöd vödi stigäda! ibä me vöds nemödik epenob osi oles.
Sevolsöd! das hisvist obsik: ‚Timotheus‛ pestadükom libio. If kömom suniko, spelob ad logön ko om olis.
Glidolsöd duganis valik olsik e saludanis valik! Litaliyänans glidons olis.
Benäd binonöd lü ols valik! So binosös!

(Pepenon lü hebreyans se Litaliyän dub ‚Timotheus‛)

---------- oOo ----------

Ninädalised