Pened de ‚Paulus‛ elanes di Ephesus

KAPIT: I

‚Paulus‛, sekü vil Goda paostolan Yesusa: Kristus, saludanes in ‚Ephesus‛ e fiedanes in Kristus: Yesus.
Benäd e püd binonsös lü ols de God: Fat obsik e de Söl: Yesus Kristus!
Palelobomöd God ä Fat Söla obsik: Yesus Kristus, kel ebenedom obis in Kristus me beneds lanöfik valasotik in sül!
Leigo evälom obis, bü stid levala, in om, ad binön saludiks e neblamabiks in löf lo om.
Ebüojonidom obis dub Yesus: Kristus ad binön ma plid vila okik cils okik,
ad lob glora benäda, me kel ebenädom obis in palöfölan,
in kel dalabobs libükami dub blud omik, e pardi sinodas, ma bundan benäda omik.
Bundaniko ejonülom obes atosi, dubä ko sap e dasev,
änunom obes kläni sluda okik. Ma plid okik edunom osi
ad leodükön ün tim pötik ini Kristus kobosumi vala, kel binon in süls e su taled.
Dub om evedobs i kekompenans pebüojonidöl gerota sekü slud utana, kel vobädom vali ma slud fümik okik.
So fägobs ad lelobön glori omik; obs, kels büo ya espelobs kömi Kristusa.
I ols, posä elilols vödi verata, gospuli beata olsik, ed evedols lekrediks, pesnilols me Saludalanal pipromöl,
kel binon panot, das ogerobs dakipi dagetota ad lelobön glori omik.
Bi elilob dö lekred olsik in Söl: Yesus, e dö löf olsik kol saludans,
no stopedob ad betikön danölo olis in pleks obik,
dat God Söla obsik: Yesus Kristus: Fat glorik, givomös oles lüäli sapa e sevädikama dub sev fulik oka.
Litükomöd logis ladälas olsik, dat sevolsös utosi, me kelos spel vokeda obik binädon, e vio liegik glor binon, keli vilom gerükön obes bevü saludans,
e vio susgretik ma vobed nämäda näma omik näm binon, keli gebädom pro obs: lekredans!
Nämi gretik ot egebädom, dubä elelifükom Kristusi se deadans, ed epladom omi detü ok in sül,
suslöpü valiks reig, nämäd, näm e dinit, löpü gredät alik, kel panemon no te in vol atimik, ab i in vol okömöl,
vali eseitom disi futs omik, ed egivom omi as cif löpikün komote.
At binon koap oma, kel binon in val e fulükom vali,

KAPIT: II

ed olis, kels äbinols deadiks demü nefölots e sinods olsiks,
kelis edunols büiko, ma lifamod in vol at, du äbinols sumätöfü plin lutema, sevabo sumätöfü lüäl, kel nog ai dareigon in meug cilas volutik.
I obs ädutobs lü ons, älifobs büikumo ma desirs mida obsik, ädunobs ma vil mida e sienas, ed äbinobs klülo, äsä votans, cils zuna.
Ab God, kel binom liegik in miser, elelifükom in löf gretik, keli labom pro obs, obis,
kels äbinobs äsvo deadiks sekü sinods, ko Kristus (pedakipols sekü benäd).
Elelifükom obis, ed egivom obes pladi in sül, bi dutobs lü Kristus: Yesus,
dat osevädikon fütüro lieg susgretik benäda omik in gud omik kol obs demü Kristus: Yesus.
Ibä demü lekred pedakipols dub benäd; no edagetols atosi dub ols it; (atos binon legivot de God);
no binon prod vobodas olsik, dat no kanolsös pleidülön demü atos!
Ibä binobs mekot omik; pejafobs pro duns gudik in Kristus: Yesus, kels peblümükons büo fa God, dat jäfobsös me ons!
Betikolsöd, das äbinols büikumo logoto pagans, kels pänemols prepüdilabans fa utans, kels esufoms säprepüdami: kötet me nams pedunöl;
das äbinols ettimo nen Kristus, plödü sif Yisraelänik, plödü diatek proma, nen spel, nen God in vol!
Ab nu, nü ols, kels ädabinols ettimo in fagot gretik, eslopikols Kristusi: Yesus, enilikols dub blud Kristusa.
Om binom ga püd obsik, ebalom paletis bofik, emoükom vümöni, neletiani,
neflenami, enosükom tä lif okik stidi büdedas in lekredalesets, dat jafomös dub balam paletas tel ko ok meni nulik, e so kodomös püdi!
dat rekosilomös dub krodam paletis bofik ko God ad koap bal, e deidomös dub atos neflenami!
Ekömom ed epredom püdi oles, kels äbinols fagiks; utanes, kels äbinons niliks,
so dub om obs: palets tel, labobs balälo lügoli lü Fat.
Klu binols no plu foginans e lälödans, ab kesifans bevü saludans, domakompenans Goda,
Ebumols sui stab paostolanas e profetanas bumädi, kela gulaston Yesus: Kristus binom,
in kel bumäd lölik pestukon gudiko, e pelöodon ad tem saludik dub kobäd ko Söl.
In om i ols pabumols ad tem lanöfik Goda.

KAPIT: III

Demü atos ob: ‚Paulus‛ binob fanäb Kristusa: Yesus pro ols: pagans.
Bo elelilols dö büad Goda, das ditib benädas pegevon obe pro ols;
das müster pesevädükon obe in dasevädükam, äsä epenob löpo oles brefiko.
Ven reidols etosi, kanols suemön dasevi obik tefü müster Kristusa;
das timü menäds votik, at no so pesevädükon ciles menas, äsä at nu pedasevädükon fa Lanal paostolanes saludik e profetanes;
sevabo, das pagans binons kegerans, limans koapa ot, e kekompenans proma in Kristus sekü gospul,
kela dünan evedob sekü benäd, keli God egevom obe dub näm nämäda okik.
Obe, pülikünane saludanas valik, pegevon benäd at: sevädükön paganes liegi nedaseivovik Kristusa,
e sevädükön kleiliko binäli müstera laidüpiko iklänöli in God, kel ejafom levali,
dat nu pasevädükonös fa komot cifodes e nämädes sülik sap mödaflanik Goda,
ma desin laidüpik, keli eledunom dub Kristus: Yesus, Söl obsik,
dub kel obs ko lekred in om labobs nenplafi ad nilikön mu konfidiko lü God.
Demü atos plekob, das no säkuradikolsös dub dränäls, kelis sufob pro ols; ats binons glor olas.
Demü atos blegükob kienis obik lo Fat Söla obsik: Yesus Kristus,
ma kel tribüt alik in sül e su taled panemon,
dat nämükomös ma bundan glora okik olis ninälo dub Lanal okik!
sodas dub lekred Kristus lödomös in ladäls olsik; e bi vulols in löf e labols stabi in on,
ofägols ad suemön ko saludans valik, kis binons vidot, lunot, dibot e geilot ona,
e sevön löfi susgretik Kristusa, dat fulolsös me ful lölik Goda!
Lü om, kel fägom ad dunön dub näm, kel binon in obs, mu mödikumo, kas plekobs u cedobs,
lü om glor in komot ed in Kristus: Yesus binonös pro menäds valik, e pro tim laidüpa ai kömöla! So binosös!

KAPIT: IV

Ob: fanäb in dün Söla nu stigädob olis ad kondötön digiko, dat digädolsös vokedi, ad kel pevälols,
mu mükiko e sofäliko, sufädiko, benokosädölo löfaliegiko ko ods,
steifölo ad kipedön balbini meuga dub tanät püda!
Binosöd koap bal e lanöf bal, äsä dub voked olsik spel bal esüikon;
Söl bal, lekred bal, bluned bal;
God bal ä Fat valanas, kel binom löpü val, dub val ed in val.
Alane obas benäd pegivon ma mafäd, sekü kel Kristus elegivom oni.
Sekü atos pepenos: ‚Ven äxänom löpio, elefanom lefanäbis, ed egivom menes legivotis‛.
El ‚äxänom löpio‛ kanon-li sinifön bosi votik, äsä: das i enexänom lü topäds donikum taleda?
Om, kel enexänom binom i otan, kel exänom löpio sus süls valik, ad fidunön vali.
Ecälom atanis paostolanis, etanis profetanis, votanis gospulanis, e dönu votanis galedanis e tidalis,
ad skilükön saludanis pro dün onsik, e pro lebum koapa Kristusa,
jüs obs valik reafobsös ad balät lekreda, ed ad dasev Sona Goda, vedobsös daülans, e dagetobsös mafi lölik fula Kristusa!
So obinobs no plu cils, kels pamufükons e pazidugons ma lüäl alik lejona pö votäl menas edavedöla, kel mikäfiko pedatikon ad pölükön obis,
ab, dub dakip verata in löf, vilobs bo vedön in tefs valik, äsä om, kel binom cif: Kristus.
Se om koap lölik pekoboyümon e pekobokipom; e bi lim alik in koboyum dunon ma näm okik, koap daglofon ad lebumön oki it in löf.
Atosi sagob kludo kazetiko oles nämätü Söl, ad no kondötön fovo, äsä pagans labü meug vanik onas,
bi täläkt onsik binon dölik, bi binons foginiks ta lif Goda, bi binons neseviks, e bi ladäls onsik binons düfäliks.
Eperölo süeni oksik, eslafükons okis de nestön, sodas dunons ko desir ai gretikumöl nepuedis valasotik.
Ab so no etidoy oles Kristusi.
If ols ga elelilols dö om, ed elärnols tefü Yesus utosi, kelos binon veratik,
mutols klemön kondöti büikum olsik, e deükön meni bäldik, kel päridikon dub desirs cütik,
e das mutols nulükön ninälo olis,
e lenükön meni nulik, kel pejafon in gid e salud ma mag Goda.
Demü atos deükolsöd lugi, alan spikonöd ko kemen okik verati! Binobs ga lims odas.
If zunikols, no sinolsöd! Sol no donionepubonöd du nog zunols!
No givolsöd diabe mögodi!
Tifan no plu tifonöd, steifonöd buikumo ad jafädön me namavob gudikosi, dat labonös bosi, keli kanon i givön utane, kel neodon oni!
Spikod miotik nonik kömonöd se mud olsik, ab vöd gudik seimik, kel devodükon utöpo, kö at paneodon, dat givonös benädi utanes, kels lilons oni!
No liedükolsöd Saludalanali Goda, dub kel pesnilols jü del libükama!
Biedäl alik, lezun, zun, luvokäd, mispik fagonsöd de ols, ed i bad valik!
Binolsöd kol ods flenöfiks ä ladöfiks, pardolsöd odes, äsä i God epardom oles dub Kristus!

KAPIT: V

Binolsöd kludo züpans Goda, as cils palöföls!
e kondötolsöd löfo! äsä i Kristus elöfom olis, ed egivom oki as legivot e sakrifot obes, ed as smel löfidik Gode.
Nepuedi, miotäli alseimik, labiäli no daloy igo betikön tefü ols, äsä sötos binön pö saludans,
leigo no badikosi, ni luspikoti, ni böfi, kels binons negidöfiks; binos gudikum ad sagön vödi danöfa.
Ibä sevolsöd, nepuedan nonik, ni miotälan, ni labiälan, kels binons äsvo lugodikultans, odageton dilodi in regän Kristusa e Goda!
Nek cütonöd olis me vöds vanik! ibä demü dins somik God zunom ta utans, kels binons nelobediks.
Klu no vedolsöd kekodädans onas!
Ibä, do ädutols ettimo lü dag, nu dutols lü lit in kobäd ko Söl. Kondötolsöd as cils lita!
(Prod lita binädon ga me dins gudik valasotik, gid e verat).
Vestigolsöd utosi, kelosi Söl plidom,
e no kompenolsöd pö vobods nenfrutik daga! blamolsöd buikumo onis!
Ibä utos, kelos padunon kläno fa ons, binon tu jemodik ad pasagön.
Alutos nu, kelos pasevädükon dub lit, vedon kleilik; e val, kel evedon kleilik, binon ga lit.
Demü atos pepenos: ‚Galikolöd ol, kel slipol! e lelifikolöd se deadans! e Kristus ostralom love ol‛.
Küpälolsöd kludo bo kuratiko ad kondöt olsik! No dunolsöd as fopans ab as sapans!
Gebädolsöd mu frutiko timi, bi dels binons badiks!
Demü atos no binolsöd nentäläktiks, ab suemolsöd kis vil Söla binon!
No brietükolsöd olis me vin, atos kodon nestöni, ab fulikolsöd me Lanal!
Spikolsöd ko ods me psams, lelobakanits, lids relöfik, kanitölo e yubölo in ladäls olsik ad lelobön Söli,
e bü val danisagolsöd Gode ä Fate nämätü Söl obsik: Yesus Kristus!
Vedükolsöd olis sumätöfü ods in dalestüm kol Kristus!
Voms binofsöd sumätöfiks lü himatans oksik, äsä lü Söl!
Ibä man binom cif voma, äsä Kristus binom cif komota; binom savan koapa.
Soäsä komot sumätöfon lü Kristus, voms sumätöfofs in dins valik lü himatans oksik.
O mans! löfolsöd jimatanis olsik, äsä i Kristus elöfom komoti, ed elovegivom oki demü on!
ad saludükön oni, posä eblunedom oni dub vöd,
ad pladön komoti gloriko foi ok, nen sten, u fron, u bos votik somik, ab dat binonös saludik ä rafinik!
So i mans sötoms löfön jimatani oksik äsä koapis lönik oksik. Utan, kel löfom jimatani okik, löfom oki it.
Ibä nek ehetom föro midi lönik okik, ab kälom e käledom oni, äsä Kristus komoti.
Ibä binobs lims koapa omik, e se mid e se boms oma.
‚Demü atos man olüvom fati e moti okikis, ed oslopom jimatani okik, e bofikans obinons mid bal‛.
Müster at binon gretik; pö atos betikob Kristusi e komoti.
Alo alan olas sötol löfön jimatani olik, äsä oli it, e vom sötof dalestümön himatani okik.

KAPIT: VI

O cils! Lobedolsöd palis olsik nämätü Söl! ibä atos binon gidik.
‚Stimolöd fati olik e moti olik‛! atos binon büded mu veütik, äsä klülädos se prom,
‚dat benolös, e lifolös lunüpo su taled‛!
Ed ols, o fats! No skänolsöd cilis olsik, ab dugälolsöd onis ko tüted e tidod Söla!
Ols, o dünans! Lobedolsöd balugiko ma ladäl olsik, dredo e dremo, sölis taledik olsik, äsä Kristusi;
no as lusumätans, as utans, kels vilons plitön menis, ab as dünans Kristusa, kels fölons ladöfo vili Goda!
klu dünölo vilöfiko, äsva dünols Söli e no menis,
bi sevols, das alan, kel edunon gudiko, lindifo va binon dünan u liban, pomesedon fa Söl.
Ed ols, o mastans! kondötolsöd leigo so kol ons, e nedunolsöd tädi! bi sevols, das labols Söli ot in süls, e das atan no binom paletöfik.
Fino, o svists obik! nämükolsöd olis in Söl, e dub näm nämäda omik!
Lenükolsöd vafemi Goda, dat kanolsös laidälön ta käfods diaba!
bi no mutobs komipön ta mid e blud, ab ta reigs, ta nämäds, ta volareigans daga, ta lanans badöfik in lutem.
Demü atos lüsumolsöd vafemi Goda, dat kanolsös tadunön ün del badik, e posä ufikomipols, kanolsös laidälön!
Blümükolsöd kludo olis ad tadun ko loin olsik pezönöl me verat, penüsteigölo ini harnad gida,
e ko futs pejuköl me klienöf ad blinön gospuli püda,
ai dakipölo jelädi lekreda, me kel kanols kvänön sagitis filöl valik badalanana.
Sumolsöd lehäti beata, e glävi lanöfik (sevabo, vödi Goda)!
Plekolsöd pö pöt alik lanöfo me plek e lebeg ziliks, e galolsöd pö atos laidälo e lebegölo demü saludans valik!
ed i demü ob, dat in mud obik vöds pasüükonsös ad sevädükön nenplafiko müsteri gospula!
demü kelos binob lesedäb in jäns, dat spikobös nenplafiko dö atos, soäsä pötos.
Dat i ols sevolsös, lio stadob e dajäfob, ‚Tychicus‛: hisvist palöföl ä dünan fiedik Söla,
keli elesedob demü atos lü ols onünom oles lölöfiko atosi. Somo osevols, lio stadobs, ed okuradükom ladälis olsik.
Püd binonöd lü svists! ed i löf e lekred de God: Fat, e Söl: Yesus Kristus!
Benäd binonöd laidüpiko lü utans, kels löfons Söli obsik: Yesus Kristus!

(At pepenon se ‚Roma‛ lü elans di ‚Ephesus‛ fa ‚Tychicus‛)

---------- oOo ----------

Ninädalised