ದ್ರಾವಿಡ ಭಾಷೆಲೆನ ಕುಟುಂಬೊಡು ತುಳು ಒಂಜಿ ಪ್ರಾಕ್‌ದ ಬುಳೆಚ್ಚಿಲ್‌ದ ಭಾಷೆ. ತುಳುವೆರೆನ ಪಾತೆರಕತೆಟ್ಟೆ ನಿಂಜಿದ್ ಇತ್ತಿನ ತುಳು ಭಾಷೆ, ಅಕ್‌ಲೆನ ಸಂದಿ ಕಬಿತೊಳೆಡ್, ಗಾದೆ ಎದುರುಕತೆಳೆಡ್, ಉರಲ್ ಕತೆಕ್ಕುಳೆಡ್, ಬಗೆಬಗೆಟ್ಟ್ ಕೇನ್‌ ದ್ ಬತ್ತ್ ದ್ಂಡ್. ಆಂಡ ಅವು ಬರವುಡು ತೋಜಿದ್ ಬತ್ತ್ ನೆ ಸುಮಾ‌ರ್ ೧೫೦ ವರ್ಷೊಗು ದುಂಬು ಬಾಸೆಲ್ ಮಿಶನರಿದಕುಲು ತುಳುನಾಡ್‌ಗ್ ಬತ್ತ್ ದ್ ತುಳುಕ್ಕೊಂಜಿ ಬರವುದ ಒರುನು ಕೊರಿಬೊಕ್ಕೊನೇ, ಇಂಚ ಬಾಯಿಕೆಬಿತ್ತ ಭಾಷೆ ತುಳು ಬರವುದ ಭಾಷೆ ಆವೊಂದು ಬನ್ನಗ, ಮಾತಾ ಭಾಷೆದ ಲೆಕ್ಕೊನೇ ಅಯಿಕ್ಕ್ ಲಾ ಒಂಜಿ "ವ್ಯಾಕರಣೊ" ಕಟ್ಟೊಡು ಪಂಡ್ದ್ ರೆವರೆಂಡ್‌ ಜೆ. ಬ್ರಿಟೆಲ್ ೧೮೭೨ಟ್ "A Grammar of Tulu Language" ಪನ್ಪಿ ತುಳು ವ್ಯಾಕರಣೊ ಬೂಕುನು ಇಂಗ್ಲಿಷ್‌ಡ್ ಬರೆಯೆರ್. ಅವು ಕರಿದ್ ೬೦ ವರ್ಸೊಡ್ ಬುಕ್ಕೊ ಉಡುಪಿದ ಪಣಿಯಾಡಿ ಶ್ರೀನಿವಾಸ ಉಪಾಧ್ಯಾಯೆ‌ರ್ ತುಳು ಭಾಷೆ ಸಾಹಿತ್ಯದ ಬುಳೆಚಿಲ್ಲ್ ಗ್ ಬೋಡಾದ್ "ತುಳುವ ಸಾಹಿತ್ಯಮಾಲೆ" ನ್ ಸುರುಮಲ್ತ್‌ದ್ ಅಯಿಟ್ಟ್ ಆರೇ ಬರೆಯಿನ "ತುಳು ವ್ಯಾಕರಣ" ಪನ್ಪಿ ಬೂಕುನು ತುಳು ಭಾಷೆಡೇ ಬರೆದ್ ೧೯೩೯ಟ್ ಅಚ್ಚಿ ಮಲ್ತೆ ರ್. ಅಯಿಡ್ದ್ ಬೊಕ್ಕ ಪಾಕ ಜನೊ ವಿದ್ವಾಂಸೆರ್ ತುಳು ಭಾಷೆದ ಮಿತ್ತ್ ಕನ್ನಡೊಡು ಬೊಕ್ಕ ಇಂಗ್ಲಿಷ್‌ ಬೂಕುಳೆನ್ ಲೇಖನೊಲೆನ್ ಬರೆತ್ತೆ‌ರ್. "ಭಾಷಾ ವಿಜ್ಞಾನ" ಪನ್ನಿನ ವಿಷಯೊ ಭಾಷೆನೇ ಅಧ್ಯಯನ ಮಲ್ಲುವ ಪೊಸ ನಮೂನೆಳೆನ್ ಪಂಡ್ದ್ ಕೊರ್ಪುಂಡು. ಅಂಚಾದೇ "ವ್ಯಾಕರಣೊ"ನ್ "ವಿವರಣಾತ್ಮಕ ಭಾಷಾವಿಜ್ಞಾನೋಂದ್ ಪನ್ಪೆರ್.
ಶ್ರೀ ಬುಧಾನಂದ ಕೆ.ಶಿವಳ್ಳಿ (೧೯೨೩-೧೯೮೨)ಇಂಬೆರ್ ಬರೆಯಿನ "ತುಳು ಪಾತೆರೊ" ಪನ್ನಿನ ಬೂಕುದ ಕೈಬರವುದ ಪ್ರತಿನ್ ಅರೆನ ಮಗೆ ಡಾ.ಬಿ.ಎಂ.ರವೀಂದ್ರೆರ್ ಎನಡ ಕೊರ್‌ನಗ, ಅಯಿನ್ ತೂದ್ ಎಂಕ್ ಆಶ್ಚರ್ಯೋಲಾ ಸಂತೋಷಲಾ ಆಂಡ್, ತುಳು ಭಾಷೆದ ಮಿತ್ತ್ ದ ಮೋಕೆಡ್ ಶ್ರೀ ಬುಧಾನಂದೆರ್ ಭಾಷಾವಿಜ್ಞಾನೂನು ಕಲ್ತ್ ದ್, ತುಳು ಭಾಷೆ ಸಾಹಿತ್ಯೊಗು ಸಂಬಂಧ ಪಡೆಯಿನ ಬೇತೆ ಬೇತೆ ಬೂಕುಳೆನ್ ಓದ್ ದ್, ತನ್ನ ಮನಸ್ಸ್ ದ ಓರ್ಮೆಗಾದ್ ಬರೆಯಿನ ಬೂಕು ತುಳು ಭಾಷೆದ ಒಂಜಿ ಮಲ್ಲ "ಕರಜನ". ನಿಜವಾದ್ ಮೊಕೆ ಇತ್ತಿನ ಒವ್ವೇ ಬೆನ್ನಿ ಮಲ್ಪುನಕುಳಾಂಡಲಾ ವಿದ್ವತ್ ದ ಬೆನ್ನಿ ಬೆನೊಲಿ, ಪನ್ಪನಯಿಕ್ಸ ಈ ಬೂಕು ಒಂಜಿ ಮಲ್ಲ ಕೊಡಿಮರ. ಸುಮಾರು ೨೫ ವರ್ಸೊಗು ದುಂಬು ಶ್ರೀ ಬುಧಾನಂದೆರ್ ಬರೆತ್ತಿನ ಈ ಬೂಕು ಒವ್ವೇ ಕಾಲೊಗುಲಾ ತುಳುಟ್ಟು ಬೆನ್ನಿ ಬೆನ್ಪುನಕುಳೆಗ್ ಒಂಜಿ ಮಲ್ಲ ಪೊದಿಕೆ. ತನ್ನ "ಮುದೆಲ್ಪಾತೆರೊ" ಡೇ ಬುಧಾನಂದದೆರ್ ತುಳುಭಾಷೆದ ವ್ಯಾಕರಣೊ ಬೊಕ್ಕ ಭಾಷಾಶಾಸ್ತ್ರದ ತಿರ್‌ಲ್‌ನ್ ತೆರಿಪಾದೆರ್. "ಭಾಷೆ-ಭಾಷಾವಿಜ್ಞಾನ"ದ ಪೊಲಬುನು ತುಳುಟ್ಟು ಕೊರ್‌ನವು ಮಲ್ಲ ಸಂಗತಿ. ತುಳು ಪಾತೆರೊದ ಇತಿಹಾಸೊನ್ ಕೊರ್‌ದ್ "ದಕ್ಷಿಣ ಭಾರತದ ದ್ರಾವಿಡ ಭಾಷೆಲೆನ ತುಲನಾತ್ಮಕ ಶಬ್ಧ ವ್ಯುತ್ಪತ್ತಿ"ನ್ ಉದಾರ್ನೆಲೆನ್ ಕೊರ್‌ದ್ ವಿವರಿತ್‌ದೆ‌ರ್.
Page:Tulu Patero 2017bmr.pdf/3
This page has been validated.
ಮದಿಪು
2
ತುಳು ಪಾತೆರೂ
