Tjeritera
SITI RISANI dengan SUTAN NASARUDIN
Si Upiak Siti Risani
duo djo Sutan Nasarudin,
Djangan diupek dagang kini
ambiak adjaran ka nan lain.
Alai2 tabang ka alai
tabanglah pipik duo tigo,
Kabalah lamo tabangkalai
kini di ulang2 pulo.
Tasia bukik kampuang Aua
merahnjo sampai ka Koto Tuo
Bialah lamo didalam lumpua
Anamun nan intan tatjelak djuo.
Tambilang dirumpun lansek
tasanda diruang lantai,
Dibilang sado nan dapek
nan tingga untuak nan pandai.
Dibawah baringin nan rimbun daun dimudiak Kualo Ajia Merah pamedanan anak mudo2 sagalo anak sutan2 tjukuik djo anak radjo2 namun dihari sahari itu , bulek kakjan nan balako. Pado maso dewaso itu harilah djauah tangah hari alah pandjang Zohor maso nantun bampia badjawek dengan 'Asar sadangnjo rami ditapian sadang babondong urang dilabuah katiko pulang urang dari ladang nan si Bujuang Sutan Nasarudin lah pulang pulo dari tapian rumah naiklah injo ka ateh didjamuakan anduak dilangkan dilatakkan sabun ditampeknjo lalu katangah biliak dalam.
Dibukak lamari: tjamin diambiak pakaian diri napakaian lah tasadio badju gewang balilin dipase-
