Robad ferr dūnd anad,
nī ba rēid bar mbagar,[1]
bīaid neach damba galar,
far scarad bid snēid:
techt in ndāil nalt nUlad
is dāl dambīa pudar,
is fada bus cumain,
mairg ragas in rēim.
Ēcoir annī rāidhi,[2]
nī hobair nīad[3] nāire,
nocho dluig āli,
nī anfam fa[t]dāig:
bī tast dīnd, a[4] gilli;
bid calma ar sīst[5] sinne,
ferr tendi nā timi,
tīagam isin dāil." Tiagam isin dāil.
Rogob in gilla na heocho ⁊ roindill in carpat ⁊ tāncadar rempo asin loṅgport "Imach, a gilla," for Fer Diad, "nī cōir i ndēnmait, dula cen celebrad do ḟeraib hĒrenn; impō dūnd agaid a each[6] ⁊ in charpait for feraib hĒrind." Roimpō in gilla aiged na nech ⁊ in charpait fo t[h]rī fri feraib hĒrenn. Is and dorala Medb ic srīblad a fūail for urlār in pupaill. "In cotlad do Ailill innosa?" or Medb. "Nād ed āmh," ar Ailill. "In g[c]luine do c[h]līamain nūa ac celebrad duit?" "An ed[7] dognīsom ōn?" ar Ailill. "Is ed ēcin" for Medb, "acht luigimsa a luigend mo tūath nā tic arna cosaib cētna chucaibsi in fer dogni in celebrad ūt." "Araba ina tairtemar (?)[8] da deigc[h]leamnas didiu," or Ailill, "acht co tǣthsad Cūchulaind lais, fō linn ce mad chomthoitim. Ane robad ferrdi lind Fer Diad do thērnom."[9]
Tānic Fer Diad remi co hāth in chomlaind. "Fēga lat, a gilla," or Fer Diad, "in fil Cūchulaind forsinn āth?" "Nād fil ām," or in gilla. "Fāga lat co maith dūn," or Fer Diad. "Nī brod[10] bec a falach Coinculaind āit a mbīad," for in gillai. "Is
