Damān athair Firdiad. Ba fer borb brogda iarom im longud ⁊ im ligi in Mand. Fer dothengt[h]ach dobeóil amal Dubthach dóel Ulad. Ba fer tailc trebur co sonairte ballraid amal Munremur mac Errcind. Trénfer tnút[h]ach amal Triscod trénfer tigi Conc[h]obair. "Ragatsa ⁊ mé anarma ⁊ conmēl eter mo lāmaib hē, ar ní miad nō mas lem arm d'imbert for siriti namulach amne." Luid iarom do saigid Conculaind. Is and bōiside ⁊ a ara forsin maig oc frecomēt int ṡlúaig. "Óenfer cucund sund," or Læg fri Coinculaind. "Cinnas fir?" ol Cūchulaind. "Fer dub dond tailc tarbda ⁊ sē anarma." "Léic sechot," ol Cūchulaind. Tic cucu lasodain. "Do c[h]ur chomlaind frit dodeochadsa," ol Mand. Gabait iarom for imt[h]rascrad fri ré cīan, ⁊ trascraid Coinculaind fo thrí Mand. Conidgreis int ara. "Díambad curadmīr do chosnam i nEmain duit," forse, "ropada[t] trēn for ōcaib Emna." Tic a ferg niad ⁊ atraig a bruth míled, cort[h]ras cair Mand fón corthi, co roscor in mināgib.[1] Conid de atá Mag Mandachta .i. Mand échta .i. écht Maind and.[2]]
Fōidis Medb arnabārach secht firu fichet ara c[h]eand i ngrellaich Conculaind; Fuiliarnn a ainm ina grellcha fri Āth Fir Dead desiu. Srāitis[3] a nōi ṅgāi fichet fair fochētōir .i. Gaili Dana cona secht maccaib fichet ⁊ mac a deirbsethar .i. Glas mac Delgna. Intan iarum rigset lāma uili dia claidmib, tic Fíacha mac Febe ina ndedhaid[4] asin dūnad. Focheirdd bedg asa charput, intan atcondairc a llāma uile i cind Conculaind, ⁊ benaid a nāi rigthi fichit dīb. Is and asbert Cūchulaind: "is cobar in[5] inn ēimib[6] ēm a ndorighnis.[7]" "Am becsa," ol Fīacha, "is tar cotach dūindi ar nUlltaib; dia rī neach dīb a ndūnad, regmani ar trichait cēt fo gin claidib." " Tongu ⁊ reliqua intan dorelced mo anāl damsa,[8]" or Cūchulaind, "nīconricfa fer dībseom a mbeathaid." Gontais Cūchulaind iarsin[9] an nōi fir fichit ⁊ dā mac Ḟicce lais occo, dā ōclǣch dāna di Ultaib dollotar do imbert a cumaiṅg frisin slōg. Is ē a gnīm insain forsin Tāin co llotar don chath la Coinchulaind. Atā isin cloich imedōn ind ātha lāthrach tele in sceth ⁊ a dornn ⁊ a glūine ⁊ rolātha a nāi coirthi fichit andsin.
- ↑ (in min)agib, the letters within the brackets are doubtful
- ↑ Here LU. breaks off
- ↑ The last s added later above
- ↑ The mark of aspiration is later; a has been added later below, and i has been altered from another letter e (?)
- ↑ Superfluous
- ↑ i neim LL.
- ↑ The mark of aspiration is later
- ↑ The sign for m is later
- ↑ ms. iar sin
