conloing firu, Feradach Find Fechtnach[1] ō nemiud Slēbe Fūait atūaid annsin."
"Tānic buiden aili and didiu isin telaich a Slemain Midi," or Mac Roth "Lǣch ūathmar inna hairinach, ossē brūach bēlmar, mēit a bēil beōlu eich, folt dondchas fair, ossē lethglōir cadissin lethanchend lāmfota, brat dub ascach[2] imbi, roth crēda and hūasa, dondbocōit[3] līæth hūasa c[h]līu, manāis muincech ina deis, claideb fota iar formnu." "Is leo lāmderg londandsclech dadānic," or Fergus. "Is ardglondach āgmar amnas, is bruth ar thīr nād fulaṅgthar, Eirrgi Echbēl ō Brī Eirgi atūaid," ol Fergus.
"Tānic buiden aile ann didiu isin telaig i Slemain Midi" or MacRoth. Dā ōclōech cǣma cosmaili diblīnaib ina hairinach, fuilt buidi foraib, dā gelscīath co tūagmīlaib argait, atā immǣs eturru, immalle doaurcbad dōib a cossa ⁊ fosruimet, noco nalt dōib taurcbāil a coss do neachtar de seach araile. Dā ānrad, dā ānloise, dā rind āga, dā chaur, dā clt[4] bāgid, dā drec, dā thene, dā cathmīlid, dā chathchuimnid ergaile, dā deil, dā dāna, dā treitill Ulad imma rīg." "Cia sin, a Ḟergais?" or Ailill. "Fīachna ⁊ Fīacha, dā mac Conc[h]obair maic Neasa, dā cridiscēl thūaiscirt Ērenn," or Fergus.
"Tānic buiden ele and didiu isin telaig a Slemain Midi or Mac Roth. "Trī hōclāich grīsta grāta[5] gormanig ina hairinach, trī bearrtha blāibuidi foraib, trī broit ōendatha impu hi forcibul, trī delgi ōir hūasa ndōitib, teora lāne monasacha co ndergindtliud i custul impu, trī scēith cosmaili oraib, trī claideb ōrduirn iarna formnu, teora slega lethanglasa inna ndeaslāmaib; atā imǣs eturru. Tria ānchinnid[6] Choba, trī mōrglonnaich Midlūachra, trī ruirig[7] Roth, trī harsidi airthir Fūata," or Fergus; "trī maic Fiachna indsain i ndegaich in tairb .i. Rus ⁊ Dāiri ⁊ Imchath," or Fergus.
"Tānic buiden aile and didiu isin telaig i Slemain Midi," or Mac Roth. "Fer bresta bruthmar ina hairinach, sūile rūaderga
- ↑ The n has been added above
- ↑ One or two letters erased at the beginning of the word; ? leg. luascach, as in LL. (Fo. 99 a)
- ↑ Second d and stroke over later on erasure
- ↑ sic, an leg. chleth?
- ↑ r later on erasure
- ↑ in later on erasure
- ↑ th has been added (? later) over rig (ruirthig), or, being immediately under the b of Choba, were they inteded to alter Choba into Chobtha?
