Is iarum aspert a araid fris. “Tēt an fer tarat amal tēti bott tar catt. Nodnigh an fer amail neghar coipp i llundai. Notcūra an fer amail cūruss ben bōidh a mac.” Is iarom lotar do cluithi[1] an ātha. Connigset indromuin Scāthach dōib diblīnaibh. Cloisid[2] Fer Diad ⁊ Cūchulaind clesa ingantai. Luid Cūchulaind iarum co rroleblaing ina scīath Fir Diad. Focerde Fer Diad hūath isind āth co fo thrī. Conangresed int ara arithisi riatiad[3] ⁊ infisi amail anāil illēss. Forbrid a mēd comba mōam oltās Fer Diad. “Fomna an gāi mbulga!” ol int ara. Tollēci ndō lasan sruth. Gaibt[h]i Cū cona ladair ⁊ imamber do Fir Diadd a timt[h]iracht a chuirp. Tochomlai amail ōengā co mba cetheōra randa fichet. Tairindi Fer Diad sīs in scīath sīs arsodin. Atnūara Cūchulaind cusann gāi ōsin scīath currobris a clēith nasnai conlā triana c[h]ride Fir Diad.
“Trēn uindes as do des
maidid asnae foidb,
mo chride is crū.
Madroferus bāig,
dorochair,[4] a Chūa.
Dursan, a eō ōir,
a Fir Diad, a āin,
a bailcbēmnig chāin,
ba būadach do lām.
Ar comaltus cōem,
a airer na sūl,
do scīath co mbil ōir
do c[h]loidem ba cōem.
T’ōrnasc arcait bāin
immo do lāim sōir,
t’ fhit[h]chell ba fiu mōir,
do grūadh c[h]orcra chōin.
Do barr buide chas,
ba bras, ba cāin sēt,
do c[h]ris duillech mǣth
nobīth imod thōeb.
