7. Katolongan.
È sèttong pasèsèr băḍă dhisana kènè' anjama Batopotè; bengkona tjoma băḍă ḍoe polo koren, tor ella paḍă rèjot kakabbhi, la-mala băḍă sè ata' langngè'. Orèngnga paḍă kèn-mèskèn, pangorèpanna tjoma dhăddhi tokang mantjèng, ta' ngennèng njambi atanè, sabăb tanana è djăḍijă tana sarassa', talèbat kadjăllă, ta' kenneng èperghi'i. Kalamon ta' èntar mantjèng, bada kèja orèng sè djă-ngadja maksa namen djhaghoeng băn sabbhrăng (tenggăng); dhinèng sè arabădhi, mon lalakè'anna èntar mantjèng, ana' binèna; maskè orèngnga tjè' omessa, tapè asèlla ta' nèmbhăngè băn malaratta sè alako, torkaḍhăng ta' metto sakalè.
Kalamon noddjhoenè ombă'na radjă paḍă adjhălăn rèng-èrèngan, sowarana salèng padjhăgghoer mokol ka pasèsèr, apa polè angènna bhărat sowarana ngaroso nako'è, taḍă' orèng sè băngal èntar mantjèng, dhăddhi kapaksa ngangghoer bhăi; mangka kalamon ta' anḍi' djhoeko' ijă ta' ollè pèssè, taḍă' sè èkabellia bherras, kapaksa ngakan sabădăna sè kennèng èkakan, sapertè: alor, bhoeloeng, kerrang, tèrem băn èn-laènna.
Anangèng na'-kana' ta' mèkkèrè sossana băn kamalaratanna orèng towana. Taona tjoma senneng, apa polè
