Ang iya mga, abyan nagpakità man sang amó nga panulok- tulok, nga pinatuhoy nila sa mga pamatan-on nga daw patyon nila sa kahisà.
—Karón saráng makahambal ang may luyag nga, ehem! —Hambal sang gobernadorsilyo nga walá matapos ang iya inogsilíng; ang ubó kag hapù bumalik na man sa pagsumpong sa iya.
Hukman sa kalinóng, walâ sing isá nga may luyag pagtawgon nga isá sang mga patres conscripti, walâ sing nagtindog: gani nga si D. Filipo naghimulós sang tión kag nangayo nga mahambal.
Ang mga konserbador nagpinangilayay kag nagmasigsinyas nga may kahulogan.
—Ipahayag ko ang akon hingyù, mga ginùo, nahanungód sa pandot! — Siling ni D. Filipo.
—Indì naton inâ mapahanugotan! — Sabát sang isá ka tigulang nga anusón, konserbador nga indì madaládala.
—Magpili kitá batok sinâ! — Silíng sang ibán nga mga ka sumpong.
—Mga ginùo! — hambal ni D. Filipo nga pinunggan niya ang isá ka yuhóm. — Walâ pa nakon mapahayag ang hingyù nga kamí nga mga pamatan-on, amon gindalá dirí. Ining' daku nga hingyù, ginasaligan namon, pagapakamaayuhon sang tanán sang sa ginaisip ukón saráng maisipán sang amon mga kasumpong. Ining may palabawlabaw nga pagpamunò nakapilas sang balatyagon sang mga konserbador, nga nagsulumpà nga magakaisahay (in corde) nga himòan siá sing mabaskog nga pagpamatok. Pumadayon si D. Filipo:
—May aton kitá nga 3,500 ka pesos nga inoghinguyang. Gani nga sa sini nga kadamuón sang kwarta saráng kitá makahiwat sing isá ka pandot nga magalutos sa katahúm sang tanán nga tubtob karón nakità na, sa aton puód ukón sa mga kaingod.
—Hmn! — Laghong sang mga indì magpati. — Ang banwa A may 5,000, ang B may 4,000; hmn! Hinambog!
—Pamatii akó, mga ginùo, kag magapati kamó! — Padayon ni D. Filipo nga walâ malingkang. Ginahingyò ko nga patindugón ang isá ka dakû nga teatro sa tungâ sang plasa, nga magabilí sing 150 ka pesos!
