DUHA KA PULONG
Sumalà sa akong napaminaw, dilì daghan ang mga Bisayâ nga nanagpakabasá sa duhá ka mga basahóng labing hinungdanon nga nasulát ni Dr. Rizal: "Noli me tangere" ug "El Filibusterismo". Samtang sa ubáng mga nasud sa kalibutan ang mga maayong basahón nga nasulát sa ilang mga makinaadmanon nasangyaw ug nabasa sa ilang mga lungsoranon, dinhi sa atò-labí na gayud dinhi sa Kabisay-an-maayo na kon sa matag-usá ka libo ka mga molupyò adunay duhá nga nakabasá nining mga basahón nga akong gihisgotan. ¡Makasubô kaayong palandungon kining hitaboa! Daghan ug nagkalainlain tingali ang mga hinungdan nga kapasanginlan niini, apan, sa akong hunàhunà, ang la bíng daku maó kiní: kay kiníng mga basahona gisulát man ni Rizal sa pinulongang Kinatsilâ.
Busà, inaghat sa akong tim-os nga tinguhà nga ang mga pag. tulon-an, mga hunàhunà, mga tinguhà ug mga pagbatì ni Rizal masangyaw ug motuhóp sa kalág ug kasingkasing sa akong isigkaBisaya, bisan kabús sa mga hiyas, gipangakohan nakò ang paghubad kining basahón nga karón akong itanyag sa kadaghanan.
Kon sa ingón niining paagiha makahinabang akó aron ang binhi nga gitisók sa Anák nga kamagulangan sa Pilipinas mabuhi ug mo'ambò kiní igò na kaayong ganti nga makabayad sa kahagò ug pagtukaw sa
ANG TAGHUBAD
Barili, Sugbu,
Agosto, 1922.
