Mizo Chanchin
(3) Suktê:
He mite hi hman lai thawnthua, “Liandova te unau” an tihte thlah hi an ni. A nakin hnu chuan Paihte ho zawng zawngah lalber an lo ni ta a, Vuitê tih chauh lo chu (Paihte ho zawng zawng) a chhiah hnuaiah a dah vek ta a. An lalber Hautinkhûpa chu a ropui ber tih theih a ni thin. An lal ṭanna erawh chu a la rei lo hle âwm e, hetiang hian an sawi:
Khanṭhuama hi Vuitê, Sawmtê leh Hualhnam hoten thah an tum a, Zahâu ramah a tlân bo va, Zahâu lal Khuangcheuva'n a lo hum a, lalah a siam ve ta a, Khuangcheuhva zarah Khanṭhuam chu a lo lal ta a ni an ti.
Khanṭhuama hian fapa pahnih a nei a. Zapauva leh Kamhâuva an ni. Zapauva'n Dothawnga a hring a, Dothawnga'n Thuamzamanga a hring a, tuna Mualbêm lal te khi an ni a, dik takin fa u zawk an nih avangin, a bul zawk tur an ni. Tin, Kamhâuva khan Haupûma a hring a, Haupûma'n Hautinkhûupa chu a hring a ni.
