Page:Mistral - Mireille-Mirèio (1861).djvu/356

   Fasié ’n soulèu !… La derrabado
   Semblavo, dison, atubado.
E li fourco de bos, de-longo, en l’èr, fasien
   Sauta de revoulun de blesto ;
   E lou póutras, e lis aresto,
   Coume de flècho d’aubaresto,
I narro di chivau de-longo se trasien.

   O pèr Sant Pèire o pèr Sant Charle
   Poudias souna, campano d’Arle !
Ni fèsto ni dimenche au paure cavalun !
   Sèmpre la matrassanto cauco,
   Sèmpre l’aguhiado que trauco,
   Sèmpre la cridadisso rauco
Dóu gardian, aplanta dins l’ardènt revoulun !

   L’avare mèstre, i blanc caucaire
   Encaro avié bouta, pecaire !
Lou mourraioun… Venguè Nostro-Damo d’Avoust.
   Deja, sus lou plantat que fumo,
   Li liame, coume de coustumo,
   Viravon mai, trempe d’escumo,
Lou fege arrapa i costo e lou mourre bavous.

   Veici que tout-d’un-cop s’acampo
   E la chavano e la sisampo…
Ai ! un cop de mistrau escoubeto l’eiròu ;
   Dis afama (que renegavon
   Lou jour de Diéu) lis iue se cavon ;
   Lou batedou mounte caucavon
Trantraio, e s’entreduerb coume un negre peiròu !