Page:Mistral - Mireille-Mirèio (1861).djvu/354

   Lou drouloun ie diguè : Pecaire !
   Capitas bèn : sian de pescaire.
Emé nous-autre, aniue, souto lou tibanèu,
   Vous coucharés au pèd dis aubo,
   E dourmirès dins vosto raubo ;
   Moun paire, pièi, à la primo aubo,
Deman vous passara, dins noste breganèu.

   — Oh ! noun, me sênte enca proun forto
   Pèr, esto niue, resta pèr orto…
— Que Diéu vous en preserve ! adounc voulès aniue
   Vèire la bando que s’escapo,
   Doulènto, dóu Trau de la Capo ?
   Ai ! ai ! ai ! ai ! se vous encapo,
Em’ elo dins lou gourg vous fai passa pèr iue !

   — E qu’es aquéu Trau de la Capo ?
   — Tout en caminant dins li clapo,
Vous countarai acò, fiheto !… E coumencè :
   I’avié ’no fes uno grando iero
   Que regounflavo de garbiero.
   Sus lou dougan de la ribiero,
Deman veirés lou rode ounte acò se passè.

   Despièi un mes, emai passavo,
   Sus lou plantat que s’espóussavo
Un roudet Camarguen de-longo avié cauca.
   Pas uno vòuto de relàmbi !
   Sèmpre li bato dins l’engàmbi !
   E, sus l’eiròu póussous e gàmbi,
De mountagno d’espigo à sèmpre cavauca !