Page:Mistral - Mireille-Mirèio (1861).djvu/342

   Souvènti-fes à soun passage,
   Li courreli que dins l’erbage,
Au pèd di reganèu, dourmien agroumouli,
   De sa dourmido treboulado
   Subran partien à grand voulado ;
   E dins la Crau sourno e pelado
Cridavon : Courreli ! courreli ! courreli !

   Emé si péu lusènt d’eigagno,
   L’Aubo, entremen, de la mountagno
Se vesié pau-à-pau davala dins lou plan ;
   E di calandro capeludo
   Lou vòu cantaire la saludo ;
   E de l’Aupiho baumeludo
Semblavo qu’au soulèu se mouvien li calan.

   Acampestrido e secarouso,
   L’inmènso Crau, la Crau peirouso
Au matin pau-à-pau se vesié destapa ;
   La Crau antico, ounte, di rèire
   Se li raconte soun de crèire,
   Souto un deluge counfoundèire
Li Gigant auturous fuguèron aclapa.

   Li testoulas ! em’ uno escalo,
   Em’ un esfors de sis espalo
Cresien de cabussa l’Ounnipoutènt ! Deja
   De Santo-Vitòri lou serre
   Èro estrassa pèr lou pau-ferre ;
   Deja l’Aupiho venien querre,
Pèr n’apoundre au Ventour li grand baus eigreja