This page has been proofread.
V
N’avié panca di, se vèi qu’uno flamo :
Quaranto boulet van coume d’uiau
Trauca de l’Anglés li veissèu reiau…
Quaranto boulet van coume d’uiau
Trauca de l’Anglés li veissèu reiau…
Un di bastimen, ie restè que l’amo !
Lontèms s’entènd plus que li canoun rau,
Lou bos que cracino e la mar que bramo.
Lontèms s’entènd plus que li canoun rau,
Lou bos que cracino e la mar que bramo.
VI
Di nemi pamens un pas tout-au-mai
Nous tèn separa : que bonur ! que chale !
Lou Baile Sufren, entrepide e pale,
Nous tèn separa : que bonur ! que chale !
Lou Baile Sufren, entrepide e pale,
E que sus lou pont brandavo jamai :
— Pichot ! crido enfin, que voste fio cale !
E vougnen-lèi dur’mé d’òli de-z-Ai !
— Pichot ! crido enfin, que voste fio cale !
E vougnen-lèi dur’mé d’òli de-z-Ai !
VII
N’avié panca di, mai tout l’equipage
Lampo is alabardo, i visplo, i destrau,
E, grapin en man, l’ardi Prouvençau,
Lampo is alabardo, i visplo, i destrau,
E, grapin en man, l’ardi Prouvençau,
D’un soulet alen, crido : À l’arrambage !
Sus lou bord Anglés sautan dins qu’un saut,
E coumenço alor lou grand mourtalage !
Sus lou bord Anglés sautan dins qu’un saut,
E coumenço alor lou grand mourtalage !
