Page:Mistral - Mireille-Mirèio (1861).djvu/336

   Pièi, dins uno èso negro, esquicho
   Lóugeiramen sa taio richo,
Qu’uno espingolo d’or sufis à ressarra ;
   Pèr treneto longo e brunello
   Soun péu pendoulo, e i’enmantello
   Si dos espalo blanquinello.
Mai elo, n’arrapant li trachèu separa,

   Lèu lis acampo e li restroupo,
   À plen de man lis agouloupo
D’uno dentello fino e clareto ; e ’no fes
   Li bèlli floto ansin restrencho,
   Tres cop poulidamen li cencho
   Em’ un riban a bluio tencho,
Diadèmo arlaten de soun front jouine e fres.

   Met soun faudau ; sus la peitrino,
   De soun fichu de mousselino
Se croso à pichot pie lou vierginen teissut ;
   Mai soun capèu de Prouvençalo,
   Soun capeloun à gràndis alo
   Pèr apara li caud mourtalo,
Oublidè, pèr malur, de s’en curbi lou su…

   Acò feni, l’ardènto chato
   Pren à la man si dos sabato ;
Dis escalié de bos, sèns mena de varai,
   Davalo d’escoundoun ; desplanto
   Dóu pourtau la tanco pesanto ;
   Se recoumando i bòni Santo,
E part, coume lou vènt, dins la niue porto-esfrai.