Page:Mistral - Mireille-Mirèio (1861).djvu/288

   Adounc pòu dire à Diéu : Peirastre,
   Que noun de iéu fasiés un astre ?
Perqué, dira lou biòu, m’as pas crea bouié ?
   À-n-éu lou gran, à iéu la paio !…
   Mai noun, moun fiéu : marrido o gaio,
   Tóuti, soumés, tènon sa draio…
Li cinq det de la man soun pas tóuti parié !

   Lou Mèstre t’a fa lagramuso ?
   Tèn-te siau dins toun asclo nuso,
Béu toun rai de soulèu e fai toun gramaci.
   — Mai, vous ai pas di que l’adore
   Mai que moun Diéu, mai que ma sorre ?
   Me la fau, paire, o senoun more !…
E coume pèr liuen d’éu bandi l’aspre soucit,

   De long dóu flume que rounflavo,
   Éu en courrènt se desgounflavo.
Vinceneto, la sorre, en plourant alor vèn,
   E ie fai au vièi panieraire :
   Avans de maucoura moun fraire,
   Ausès-me, pai ! I’ a’n labouraire,
Au mas ounte serviéu, qu’èro amourous tambèn ;

   L’èro de la fiho dóu mèstre,
   Alis ; éu, ie disien Sivèstre,
Au travai (tant l’amour l’avié fa courajous !)
   Èro un loup ! en touto obro abile,
   Abarous, matinié, doucile…
   Li mèstre, anas, dourmien tranquile.
Un matin… — regardas, paire, s’es pas fachous !