Page:Mistral - Mireille-Mirèio (1861).djvu/274

   O divin arc-de-sedo ! inmènso,
   Eterno e sublimo clemènco !
Vese uno terro novo, un soulèu que fai gau
   D’óulivarello en farandoulo
   Davans la frucho que pendoulo,
   E sus li garbo de paumoulo
Li meissounié jasènt que teton lou barrau.

   E, desnebla pèr tant d’eisèmple,
   Diéu es adoura dins soun tèmple…
E la masco di Baus, acò di, ’mé lou det
   I dous enfant mostro uno draio
   Qu’un fiéu de jour au bout ie raio,
   Menu, menu… Parton en aio,
E la gaugno aferado, e courbant lou coutet.

   De souto terro, au Trau de Cordo
   Lou bèu parèu enfin abordo ;
Remounton au soulèu… Acatant lou roucas
   Emé si roumo e soun vieiounge,
   Mount-Majour, l’abadié di mounge,
   I’aparèis coume dins un sounge.
Se fan uno brassado, e gagnon lou jouncas.