Page:Mistral - Mireille-Mirèio (1861).djvu/222

   Se precepiton ; e, culido,
   Entre si man l’obro poulido
Vèn uno flour ; e quand, pèr un bouquet n’an proun,
   À Diéu, alègre, lou fan vèire,
   E vers li porto de Sant Pèire
   La flour emporto lou cuièire.
Dins l’engrau de la mort toumba de reviroun,

   I negadis ansin Diéu meme
   Dono un relais pèr se redeme.
Mai souto lou glavas dóu fluve segrenous,
   Avans que l’aubeto s’enaure,
   Ve-n-en que tournaran s’enclaure :
   Negaire de Diéu, manjo-paure,
Tuaire d’ome, traite, escabot vermenous

   Cereon uno obro que li sauve,
   E noun poussigon dins lis auve
Que pecatas e crime, en formo de caiau
   Mounte soun artèu nus s’embrounco.
   Fin de mióu, fin de cop de rounco !
   Mai éli, dins l’erso que rounco,
Sèns fin barbelaran lou perdoun celestiau !!

   Coume un bregand à-n-un recouide,
   Ourrias aqui l’arrapo au couide :
— L’aigo dins lou batèu !! — I’a l’agoutat, respond,
   Tranquile, lou pilot. En aio,
   Ourrias agoto, e zóu ! travaio
   Coume un perdu !… De Trincataio
Li Trèvo aquelo niue dansavon sus lou pont.