Page:Mistral - Mireille-Mirèio (1861).djvu/202

   Pièi arpatejon, pièi s’alucon,
   Prenon lou vane, e zóu ! s’ensucon.
E prenon mai lou vanc, e de mourre-bourdoun
   Fan restounti li cop de tèsto.
   Longo e marrido es la batèsto,
   Car es l’Amour que lis entèsto,
Es l’Amour pouderous que li buto e li poun.

   Ansin éli dous tabassavon,
   Ansin, furoun, s’escabassavon.
Ourrias a recassa lou proumié lavo-dènt ;
   Mai coume l’autre lou menaço
   D’un nouvèu cop, sa grand manasso
   S’aubouro en l’èr coume uno masso,
E d’un large gautas amassolo Vincèn.

   — Tè ! tè ! frestèu, paro aquéu lèpi !
   — Tasto, moun ome, s’ai lou grèpi !
Se cridon l’un à l’autre. — Ardi ! comto, bastard,
   Li blaveiròu mounte s’enfounso
   La rintraduro de mis ounso !
   — E tu, moustras, comto lis ounço,
Lis ounço de sang viéu qu’espiron de ta car !

   Alor s’arrapon, se póutiron,
   S’agroumoulisson e s’estiron,
Espalo contro espalo, em’ artèu contro artèu ;
   Li bras se trosson, se fringouion
   Coume de serp que s’entourtouion ;
   Souto la pèu li veno bouion,
Lis esfors fan tibia li tento di boutèu.