Page:Mistral - Mireille-Mirèio (1861).djvu/200

   Coume un lebriè tanco un bestiàri,
   Tancavo aqui soun aversàri.
— Que, digo ! ie cridavo à s’esgargamela,
   Long galagu, que t’estrampales
   Sus ta ganchello, bèn ? davales
   O te davale ?… Cales ? cales,
Aro qu’anan saché quau tetè de bon la ?

   Es tu, gusas, que portes barbo ?
   Te caucarai coume uno garbo !
Es tu qu’as mespresa la vierge d’aquéu mas,
   Mirèio, la flour dóu terraire ?
   O, iéu, lou marrit panieraire,
   Iéu, Vincenet, soun calignaire,
Van lava ti mesprés dins toun sang, se n en as !

   Mai lou vaquié bramo : Àrri ! àrri !
   Bóumian, calignaire d’armàri !
Espèro, espèro-me !… Sus-lou-cop sauto au sòu ;
   Apereila li vèsto volon ;
   Picon di man, lis èr tremolon ;
   Souto éli li caiau regolon ;
Un sus l’autre à la fes parton coume dous biòu.

   Ansin dous brau, quand sus lis erme
   Lóu souleias dardaio ferme,
An vist lou péu courous e li large malu
   D’uno vaco jouino e moureto
   Bramant d’amour dins li sarreto…
   E sus-lou-cop lou tron li peto,
E d’amour sus-lou-cop vènon foui e calu.