Page:Mistral - Mireille-Mirèio (1861).djvu/188

   Souvènti-fes, à l’ouro fresco
   Ounte la terro s’enmouresco,
Alor que dins li prat li fueio de tréuloun
   Se replegon afrejoulido,
   Is alentour de la bastido
   Ounte restavo la poulido,
Venié, tout treboula, faire lou parpaioun.

   E d’escoundoun, emé’n fin gàubi,
   Dóu lucre d’or o dóu reinàubi,
Imitavo de liuen lou canta dindoulet :
   La jouveineto afeciounado
   Qu’a lèu coumprés quau l’a sounado,
   Venié lèu à la bouissounado,
Cauta-cauto, e lou cor douçamen tremoulet.

   E lou clar de luno que dono
   Sus li boutoun de courbo-dono ;
E l’aureto d’estiéu que frusto, à jour fali,
   L’auto barbeno dis espigo,
   Quand, souto la molo coutigo,
   En milo e milo rigo-migo
Se fringouion d’amour coume un sen trefouli ;

   E la joio desmemouriado
   Qu’a lou chamous, quand à si piado
Tout un jour a senti, dins li ro dóu Queiras,
   Li cassaire que lou fan courre,
   E qu’a la longo sus un moure
   Escalabrous coume uno tourre,
Se vèi soul, dins li mèle, au mitan di counglas ;