Page:Mistral - Mireille-Mirèio (1861).djvu/178

   — Bello, diguè l’enfant sóuvage,
   Se, pèr mariage o roumavage,
Venias à Séuvo-riau, ounte la mar s’entènd,
   Bello, n’aurias pas tant de peno ;
   Car la vaco de negro meno,
   Libro e feroujo, se permeno,
E jamai noun se mous, e li femo an bèu tèm.

   — Jouvènt, mounte li biòu demoron,
   De languimen li chato moron.
— Bello, de languimen, en estènt dous, n’i’a ges !
   — Jouvènt, quau eilalin s’esmarro,
   Dison que béu uno aigo amaro,
   E lou soulèu i’usclo la caro…
— Bello, souto li pin à l’oumbro vous tendrés.

   — Jouvènt, dison qu’i pin i’escalo
   De tourtouioun de serp verdalo !
— Bello, avèn li flamen, avèn li serpatié
   Qu’en desplegant soun mantèu rose
   Ie fan la casso, long dóu Rose…
   — Jouvènt, escoutas (que vous crose),
Soun trop liuen, vòsti pin, de mi falabreguié.

   — Bello, entre capelan e fiho,
   Noun podon saupre la patrio
Ounte anaran, se dis, manja soun pan un jour.
   — Mai que lou manje emé quau ame,
   Jouvènt, rèn autre noun reclame
   Pèr que de moun nis me desmame.
— Bello, s’acò’s ansin, dounas-me voste amour !