Page:Mistral - Mireille-Mirèio (1861).djvu/172

   Ai ! tout lou pople di man pico :
   Ourrias, blanc de pòusso oulimpico,
Pèr li bano, à la courso, à la fin n’a pres un,
   E tèsto e mourre, e forço à forço !
   Vòu desclava si bano torso,
   Lou negre moustre, e se bidorso,
E bramo de furour, e nino sang e fum.

   Vano furour ! bound inutile !
   Lou bouvatié, d’un cop sutile,
Amourro à soun espalo, en ie troussant lou còu,
   L’orro testasso dóu bestiàri ;
   E rudamen e pèr countràri
   Butant la bèsti, coume un bàrri
E crestian e bestiau barrulon pèr lou sòu.

   Uno esglaiado cridadisso
   Estrementis li tamarisso :
Bon ome, Ourrias ! bon ome !… E cinq drole espalu
   Tenien lou brau. De soun empèri
   Pèr ie marca lou batistèri,
   Ourrias éu-meme pren lou fèrri,
E’ mé lou fèrri caud ie rimo lou malu.

   Un vòu de fibo d’Arle, en sello,
   Emé lou sen que ie bacello,
Enflourado au galop de si cavalot blanc,
   Vènon i’adurre uno grand bano,
   Raso de vin ; e dins la piano,
   Zóu mai ! lou fouletoun s’esvano…
Un vòu de cavalié li seguisson, brulant.