Page:Mistral - Mireille-Mirèio (1861).djvu/160

   Vergougno à tu, raço omenenco !
   Li cavaloto Camarguenco,
Au pougnènt esperoun que i’estrasso lou flanc,
   Coume à la man que li caresso,
   Li veguèron jamai soumesso.
   Encabestrado pèr traitesso,
N’ai vist despatria liuen dóu pàti salan ;

   E’n jour, d’un bound rabin e proumte,
   Embardassa quau que li mounte,
D’un galop avala vint lègo de palun,
   La narro an vènt ! e revengudo
   Au Vacarés, que soun nascudo,
   Après dès an d’esclavitudo,
Respira de la mar lou libre salabrun.

   Qu’aquelo meno sóuvagino,
   Soun elemen es la marino :
Dóu càrri de Netune escapado segur,
   Es encaro tencho d’escumo ;
   E quand la mar boufo e s’embrumo,
   Que di veissèu peton li gumo,
Li grignoun de Camargo endihon de bonur,

   E fan brusi coume uno chasso
   Sa longo co que ie tirasso ;
E gravachon lou sòu, e sènton dins sa car
   Intra lou trent dóu diéu terrible,
   Qu’en un barrejadis ourrible
   Mòu la tempèsto e l’endoulible,
E bourroulo de founs li toumple de la mar.