Page:Mistral - Mireille-Mirèio (1861).djvu/150

   E peréu (ounourable signe
   Que dóu troupèu acò ’s li segne)
An li costo floucado e l’esquino tambèn
   Camino en tèsto de la troupo
   Lou baile-pastre, e de sa roupo
   Li dos espalo s’agouloupo.
Mai lou gros de l’armado arribo d’un tenènt.

   E’n uno pòusso nivoulouso,
   E di proumiero, e di couchouso,
Courron lis agnelado, en bramant loungamen
   Au belamen de si berouge ;
   E, lou coutet flouca de rouge,
   Ensèn poussejon lis anouge
E li móutoun lanu que van paloutamen ;

   Li pastrihoun de vòuto en vòuto,
   E qu’i chin cridon : À la vòuto !
E, pega sus lou flanc, l’innoumbrable vaciéu,
   Li nouvello, li tardouniero,
   E li segoundo, e li maniero,
   E li fegóundi bessouniero
Qu’an peno à tirassa soun vèntre empachatiéu.

   Escarradoun tout espeiòti,
   Entre li turgo, li vièi mòti
Qu’an agu lou dessouto i batèsto d’amour,
   Emé li berco e li panardo,
   Clauson enfin la rèire-gardo,
   Aret creba, tristo desfardo,
Qu’an perdu tout ensèn e li bano e l’ounour.