- Bulak sa mga bulak — Hamuskag nga lamharon,
- Nga sang hangin naduyan — Sa maanggang’ ambahanon,
- Dupoy sang paghigugma — Huyuhoy nga hamili;
- Ikaw nga’ng kalipayan — Bisang diin mo makita
- Ikawng’ nagayuhoin — Kag wala nagakagha,
- Lunsay lamang kaamyon — Lunsay lamang kaputli;
- Ikawng’ sa kalibutan — Ayhan ikaw lumosad
- Sa pagpaumpaw sa dughan — Sang kagha ginalahad,
- Sa paghatag kalipay — Sa isang’ tagipusuon;
- Siling nilang’ may yara — Ka sa imo banagbanag
- Kalag nga may kaputli — Kag kalag nga nabihag
- Sa tunga’ng mga gaway — Sang isang’ balatyagon?
- Siling nila bisan diin — Ang maayo imo nasabwag,
- Katulad sang pagdulot — Panahon sang pamuskag
- Sing kasadya kag bulak — Sa matahum nga Abril.
- Siling nila’ng kalag — Imo nga ginaiwagan
- Kon magdulom ang gal-um, — Nga tunok nawalaan
- Gatubo’ng mga bulak — Sa maanyag mong’ hardin.
- Kon imo ginalipay — Katulad sang diwata
- Yadto’ng gaagum balani — Sang imong’ mga mata
- Nga sang Makagagahum — Sa imo Iya ginhatag,
- Sang tion ako hatagi — Sang imo kalipayan,
- Sang imo nga kabuhi — Sing isa ka adlaw lamang,
- Agud ang akon dughan — Sing kalipay bumatyag.
(1) Ini nga sinulatan nakita sa iban nga mga sinulatan nga ginkuha sa mga nagkaladula nga tinipon ng mga papel nahanungod kay Rizal, suno kay Dn. Jayme C. de Veyra, nga nagatuo nga isa lamang ka tipik. Wala sing petsa.
Ang Bibliyotekang’ Pungsudnon nagatipig sang tunay nga huwad sini nga binalaybay sang bantog nga Kalambahanon. Nasulat sa isa ka papel nga narayahan. Ang “Poesias de Rizal” ni Dn. Jayme C. de Veyra may isa ka huwad sini nga sinulatan sa mga pamihak 59 kag 60.
* Tipik — Amo ini ang pagtawag namon sini nga binalaybay. Nakita namon nga amo ini, nga nakasimpon sa iban nga mga sinulatan nga nasapwan sini’ng karon sa nagkadula nga tinipon nga mga sinulatan ni Rizal. Isa lamang ini ka hanashanas; apang ang ikatakos sang tagsulat nagapahayag na sing pagkahamtong: wala kami makapugong sa paghuwad sini diri, nga ginlakip ini sa sini nga mga binalaybay. Ang iya lalim katulad sang isa ka madrigal siling nila nga ayhan indi malawig: daw sa may nakulang (amo man gani nga indi bug-os): ang pagtulupong sang takos nagapakita. — TAGPABALHAG.
