Page:Mga Binalaybay V.3.pdf/182

— 174 —

   Isugid kon diin mahinay nawala,
Yadto'ng mga luha, nga sang dupoydupoy,
Sang iya kuyos iya nga gin-angga
Sing puti'g pula lunsay nga nalugom?
----------
   Ayhan isang anghel nga sang kalipayan
Naghatag sina sa diutay nga bulak,
Agud sa pagbutlak isang' kaagahon,
Mangin-pahamot iya nga himuon.
----------
   Sila ayhan nagsaka sa dambana
Sang Dios sa tunga'ng mga tulalay
Subong mahipos pangading' mainit
Sang isang tinugang' ginapigos.
----------
   Sa paglupad nga may katahuman,
Sa hangin nag-agi sing madasig,
Sa tunga'ng malulot nga ambahanon
Makatilingalang' panan-awan.
----------
   Maputing' panapton nga puno
Sing nagabanaag nga kasilaw
Gaputos lambong yang' kawayanon
Nga wala pa gid sadto makita.
----------
   May puning' lawrel ang iya agtang
Nga nagasidlak subong sang adlaw
Kag ang lira, nga iya ginakuskos,
Ang mga banting lunsay bulawan.
----------
   Puno'y kabuhi iyang panulok,
Puno sing ulay nga paghigugma,
Nga'ng putli niyang' mga kasanag
Nagabihag sang tagipusuon.
----------
   Nagadabdab nga asul sang Langit
Sa iya mata ginbutang sang Diwa,
Kag ang iya nga mga buhok
Binuboan bukbok nga bulawan.
----------
   Kapula sang mga bibig niya
Pagahisaan sang mga bulak,
Sia ang pinakaali sang Venus
Diin gapugad ang paghigugma!