This page has been proofread.
74
canti corsi
VII
U jornu d’i Morti
A u scio Ch. J. Maschetti.
Sentite cume sonanu pietose
E campane di a chiesa parucchiale!
Si diceria un pientu naturale,
E rinnovanu e pieghe dulurose.
Un bi pare chi sia in stanze chiose
Chi scoppianu ste chiame sepulcrale?
Ci facenu a lu core cusi male!...
E purtantu elle so voce amurose.
So di babbi, di mamme e di fratelli,
Di figlioli, d’amici e di cumpagni,
L’angoscie, li singhiozzi, i pienti e i lagni.
So le voce, un cè a di, di tutti quelli
A quale no’ pensemu mane e sera:
Ci dumandanu, i tinti! una preghera.
