This page has been proofread.
236
canti corsi
«Tutti quanti p’e campagne,
Pe i paglieghj e pe le grotte,
Era nantu lu pilone
Chi durmiate la notte,
Senza teme nè l’agrura,
Ne catàrru, nè puntura.
«E u pilone è sempre statu
Di tutti lu cumpagnone;
Fussite a lu fuculaghiu
O puru in casa, a u fucone.
Quanti chi ci n’hai sciaccatu...
Statti zittu, o Corsu ingratu!
«Avà un ti ricordi più
Quandu ti servia di lettu,
Stanze, salottu e cucina...
Tutt’era sott’u mio tettu.
Pertuttu dunde tu andava
U pilone ti purtava.
«Quantu corte eranu e veghie,
Quandu scalzu ti ne stava
Straquatu nant’u pilone
E chi a to moglie filava...
Leghienduli qualchi passu
Di l’Ariostu o di Tassu.
