This page has been proofread.
232
canti corsi
Corsi subitu in granaghiu,
Ma restai imbisistitu,
Quandu vidi a pelu rittu
U pilone ingrillizzitu,
In un cantu, infurchizzatu,
Chi stava cume un prelatu.
Eccu cosa si sentia
In su strepitu tamantu:
«Aghiu ragiò di lagnami
Di li Corsi per... mio santu!
Perchè un n’hanu pe u pilone
Rispettu ne affezzione.
«Perchè, o Corsi, cusi prestu
M’avete dimenticatu?
Dumandate a Sambucucciu
Di me, s’ellu s’è scurdatu.
Dumandate a tutti quanti...
Un n’è micca che mi vanti.
«Dumandatela a Sampieru
Eppò a lu vecchiu Cardone;
O puru a Pasquale Paoli
Quantu valia lu pilone;
O a Lœtitia Ramolino
Quand’era a u lagu di Nino.
