This page has been proofread.
192
canti corsi
Quandu t’era chiuculellu,
A notte cume lu jornu,
Era a chiccara in d’un scornu,
Sempre piena a simulellu;
Callu-callu, u t’imbuccava
A to mamma, cusi brava.
Quanti fideletti fini,
Quantu risu inzuccaratu,
In d’a chiccarella, o ingratu!
T’hanu còttu... e tagliarini,
E puntette, e maccaroni,
Né? quantu ch’eranu boni.
A sera all’avemmeria,
O quandu spricchiava l’alba,
Era tisana di malba
Ch’in di a chiccara cucia:
O latte senza disparu
Se tu avia lu catàrru.
Eppò quandu s’ingrandatu
Più panecottu un bulia:
Quante volte a scutumia
A la chiccara hai datu.
A to mamma cun pazienza
T’imparava la crianza.
