KABA
PUTI NILAM TJAJO
dengan
DANG TUANKU GOMBANO ALAM
Alai alai tabang ka Alai
Tabanglah pipik duo tigo
Tabang ka ateh bungo rajo
Hinggok dikaju marapalam
Kaba lah lamo tabangkalai
Kini diulang ulang pulo
Tjurito hikajat Nilam Tjajo
Sarato Dang Tuanku Gombang Alam
Kaik bakaik rotan sago
Takaik diaka baha
Kapa balaia ka Bangkahulu
Mulo Kalangik tabarito
Djatuah kabumi djadi kaba
Tjurito urang nan dahulu
Rami pakan Sungai Landai
Banjak mandjua aso aso
Dibao nak urang Ulakan
Bukan toh hambo tjadiak pandai
Kok ado kato kurang mardeso
Hambo nan usah digalakkan
Pado maso dahulunjo dalam nagari Sari Bunian pasa nan sadang rami bana rami diurang djua bali hari nan sadang tangah hari paneh sarupo mambalah banak. Ada baduo laki bini urang mularaik sangaik misikin badju dibadan tjumping tjampiang kain lah bare' dek panumbok badannjo kuruih kurang makan masuk pasa kalua pasa mantjari siso nan tabuang untuk dimakan ubek litak Sudah takadia buruak untuang urang nan banjak bangih berang surang tidak manaruah hibo bantji mantjaliak kasamonjo ado mamungkang djo mambae dipungkang dibae djo batu
