[LU:]
slóig oc airimimirt (sic) techta thairis, ocus ni huli ro sagat. Slóg dib, is lethan dóib in drochet o thús co dered, co roichet ógslán cen uamun, cen imecla tarsin n glend tentide. Slóg aile dan oc á insaigid, cæl dóib ar thus he, lethan immorro fo deóid, co rochet iarom amlaid-sin tarsin n glend cétna íar mórgábud. In slóg dedenach immorro, lethan dóib ar thús in drochet, (p. 30a:) cóel ocus cúmung fó deóid, co tuitet día medon isin glend n gaibthech cétna i m brágtib na n ocht m biast m bruthach út ferait a n aittreb isin glind.
23. Is íat lucht díar bo soirb in sét sain, ǽs óige, ǽs atrige lere, ǽs dergmartra dutrachtaige do Día. Is í dan fairend diar bo chumuc ar thús ocus díar bo lethan fo deóid iarsin in sét, drem timairciter ar ecin do denam thole Dé, ocus soit a n écin iarsin i toltanche fognoma do Día. Is dóib immorro ro bo lethan ar thús in drochet ocus díar bo chumung fo deóid, dona pecthacaib, con túaset fri forcetol bréthre Dé ocus ná comaillet iarna clostin.
[LBr:]
is lethan dóib in droichet o thus co deriud, co roichet ógṡlan cen uamun darsin n glend téntidi. Slog aile tra ic a inottacht, coel dóib ar tús he letan fá deoid, co róichet amal sin darsin n glend cetnai. In slog dédenach immorro, lethan doib ar tús hé, coel tra ocus cumang fa deoid, cu toitet dia medon isin n glend n gaibtech cetnái i m braigtib na n ocht m biast m bruthach ucut ferat a n aittreb isin glind.
23. Is e tra lin diar ba soirb in set sin, i. oes óigi ocus oes aitrigi léri ocus oes dergmartra dúthrachtaigi do Dia. Is í tra ferend diar bo cumang ar tús ocus diar bo letan iarom in set, i. dreamm timaircther ar écin do dénum toli Dé, ocus soait a n écin i toltnaigi ḟognuma don choimdid. Is doib immorro ba letan ar tús in droichet ocus cumang bá deoid, i. dona pecdachaib, con tuaiset fri precept bréthri Dé ocus nanascomallat iarom.
