[LU:]
19. Is adbul trá ocus is dírim failte muintire nime ocus in comded fessin frisin n‑anmain in tan sin, mád anim ennac firen hí. Mad anfirén immorro ocus mád anforbthe ind anim, fogeib anmine ocus acairbe ón chomdid chumachtach. Ocus atbeir fri aingliu nimi: Tarrgid lib, a aingliu nimi, in n‑anmain n‑ecráibdig sea ocus tabraid illáim Lucifir día badud ocus día formúchad i fudamain iffrind[1] tria bithu sír.
20. Is andsin iarom scarthair ind anim thrúag sin co áigthide ocus co hacarb ocus co adúathmar ri frécnarcus flatha nime ocus gnussi Dé. Is and dan dolléci in n‑osnaid as trommu cach n‑osnaid, oc techt i n‑gnúis díabail íar n‑ascin óibniussa flatha nime. Is and scarthair fri comairge inna n‑arcaingel lasa tánic dochum nimi. Is andsin dan slucit na dá draic déc thentide cach anmain d’éis a céle,
- ↑ iffrird LU.
[LBr:]
19. Is adbul tra ocus is difaisnéti failti múintiri nime ocus in choimded fessin frisin anmain andsin, mad ennach firián hí. Mad anfíren din ocus mad anforbthi in anim, fogeib anmíne ocus acairbi on choimdid chumachtach. Et dixit fri haingliu nime: Hanc animam multo (sic) peccantem angelo Tartari tradite et demergat eam in infernum. Tairngid lib a aingliu nime in anmain n‑écraibdig sea ocus aititnid illáim Lúcifir dia bádud ocus dia formúchad i fúdomain ifirn co sír.
20. Is and tra scarthair in anmain anḟechtnaig co haigthigi aduathmar fri frecnarcus flatha nime ocus gnúisi Dé. Is and sin beos scarthar fri comairci na n‑árchaingel lasa tucad co ríched. Is and sin do léci in osnaid is truma cech n‑osnaid, oc techt i n‑gnúis diabuil iar n‑aicsin óibniusa múintire nime. Is and sin slucit na dá draic déc tentide co nóe (sic) déis aroli in anmain, conuslúi uathi in draic iníchtarach
