[LU:]
11. In cathir íarom ina fail in rígsudi sin, is amlaid atá, ocus secht múir glainide co n‑dathaib écsamlaib ina thimcell, airdiu cach múr araile. Lebend immorro ocus fond iníchtarach na cathrach di glain gil atacomnaic co n‑gné gréne fair iarna brechtrad di gurm ocus chorcra ocus úani ocus cacha datha archena.
12. Muinter bláith romín rochennais dan cen esbaid nácha mathiusa foraib, is iat aittrebait in cathraig sin. Ar nís rochet ocus nís aitrebat do grés acht nóemóig no ailitrig dútrachtacha do Dia. A n‑ecor immorro ocus a corugud, is dolig a fiss cinnas forcǽmnacair, ar ní fil druim neich dib no a slis fri áraili, acht is (p. 28b:) amlaid ros córaig ocus ros comét cumachta díasnéte in chomded, gnúis fri gnúis ina srethaib ocus ina corónib comardaib mórthimchell ind rígsuide immá cuaird co n‑ánius ocus co n‑áibinnius ocus a n‑aiged ule fri Día.
13. Crand caingil di glain eter cach dá claiss co cumtuch
[LBr:]
11. In chathair iarom ina fil in rigṡudi sin, is amlaid ata, ocus secht múir gloinide co n‑dathaib ecsamlaib ina timcell, ardiu cech múr araile. Lébend immorro ocus fond iníchtarach do gloin gil atacomnaic co n‑gné grene fair.
12. Múinter romín rochendais din cen esbuid nach maithiusa forru aittrebus in catraig sin. Ar nis inaitcet ocus nis aittrebat in catraig sin do gres, acht nóim no ailitrig no aitrigig dúthrachtaig do Dia. A n‑ecor immorro ocus a n‑ordugud, is dolig a ḟis cindus forcoemnacar, ar ni fil druimm no sliss neich dib fri aroli, acht is imlaid ron coraig ocus ron coimet cumachtu diasnethi in choimded gnúis fri gnúis ina srethaib ina corónib comardu immortímchell in rigsudi bá cuairt co n‑áinius ocus óibnius ocus a n‑aiged uli fri Dia.
13. Crand caingil do gloin itir cech dá clasaig có cum-
12
