[LU:]
beth dan d’airfiteod do neoch acht cocetul comchubaid na cethri coloman sin, ro (p. 28a:) pad lor do glóir ocus d’aibnius do. Tri eóin aregda imorro isin chathair i fiadnaise ind ríg, ocus a menma ina n‑dulemain tria bithu, isse sin a n‑dan. Celebrait dan na ocht trath oc molad ocus oc adamrugud in coimded co claischétol aircaingel oc tiachtain fói. O na henaib iarom ocus ona harcainglib tinscetal in cheóil, ocus nos frecrat iarsin muinter nime ule eter nóemu ocus nóemóga.
8. Stúag dermár dan os chind ind ordnide ina chatháir rigdai amal cathbarr cumtachta no mind ríg. Dia nos faictis roisc doenna, no legfaitís fo chétóir. Tri cressa ina mórthimchell etarro ocus in slúag, ocus ni fes la túaraiscbáil cid atas comnaic. Sé míle do míledaib co n‑delbaib ech ocus én imon catháir tentide for lassad cen crích cen forcend.
9. Aisneis iarom in comded cumachtaig fil isind rigsuidi sin, ní thic do neoch acht mád doneth féin, no mani ebrad
[LBr:]
sin, ro bad lór do glóir ocus d’óibnius dó. Tri héoin oiregdu immorro isin catraig i fiadnaise in rig, ocus a menma ina n‑duilemain tria bithu, is e sin a n‑dán do gres. Celebrait tra na hocht tratha ic molad ocus oc adamrugud in choimded co claiscetul archaingel ic tidacht doib fói. O na hénaib tra ocus o na harchainglib tindscetul in céoil, ocus nos frecrat munter nime uli itir noemu ocus noemóga iarsin.
8. Stuag dermáir tra ós cind in ordnigi ina chathair rígda, amal cathbarr cúmdachtu no amal mínd rigda. Dia nos aictís ruisc doennai, no legfatís fo cetoir. Tri cressa ina morthímchell eturru ocus in slóg, ocus ní fess la tuaruscbail cid atuscómnaic. Sé mile do míleduib co n‑delbu ech ocus én imon cathair tentidi for lassad cen crich cen forcend.
9. A aisnes tra in choimded cumachtaig til isin rígsudi sin, ní thic do neoch acht mine dernad fen no mine erbrad
